Muzium Pesaka Bansa mujur dipenyadi Kepala Menteri

0

SRI AMAN: Nengeri Sarawak sekali agi ngangkatka pemanah palan sejarah ke bisi di menua tu iya nya Kubu Alice tauka Muzium Pesaka Bansa Sri Aman ke udah mujur dipenyadi Kepala Menteri Datuk Patinggi Tan Sri Adenan Satem, kemari.

Palan tu digaga jeman perintah kolonial, Rajah Brooke sebilik, diatu udah dikemanah lalu diberi nama Muzium Pesaka Bansa Sri Aman.

Kelimpah ari nya, pengerami tu diatur nyerumba Pesta Bena 2015, iya nya pengerami ninting taun ba pelilih menua tu.

Adenan maya bejadi muzium tu bisi dibai raun ngelinggi muzium seraya disempulang bala pemesai enggau pengereja pengawa ba palan nya.

Lebuh dirandau raban pemberita, Adenan madahka iya tekait ati meda pemanah asil jari ba bengunan muzium baru nya.

Iya mega bekunsika cherita ke udah kala dibacha iya kenyau ari beberapa taun ke udah pasal Kubu Alice.

“Aku berasai rindu sereta tekait ati enggau asil raban orang ke nyaga sereta ngemeranka pemanah palan nya beduduk ari pengawa pansik ke mungkur belanja ti besai.

Muzium tu tau mai runding tauka asai ati ke nyelai kelebih agi iya mai kitai nikal pulai ngagai jaman perintah kolonial kelia,” ku iya.

Nitih ka padah Direktor Opis Mujium Sarawak, Ipoi Datan, pengawa tu seiti ari beberapa iti bengkah pansik ke diatur opis nya dikena ngadaka msereta nambah mayuh gai palan ke manah endur pengawa dagang temuai ba menua Sarawak tu.

“Palan ke bisi ngembuan cherita asal baka Kubu Alice tu deka begunaka mayuh begunaka aum belanja beduduk ari iya ke ngembuan cherita ba sejarah menua Sarawak.

Ketegal nya kami, begulai enggau raban ajensi bukai bebendar dalam ngereja batang pengawa dikena nyungkak pemanah ngagai palan ke baka tu,” ku iya.

Ipoi madah, belanja dikena ngaga pemanah ngagai bagunan ke berega nyauka datai RM5 juta (RM4,924,391.50), iya berasai gaga ketegal projek nya ulih tembu dalam kandang masa ke ditetapka. Ba rikod, pengawa ngaga pemanah ngagai bangunan tu berengkah ari taun 2012.

Bela sama bisi datai ba pengerami tu Bini Kepala Menteri Puan Sri Datin Patinggi Datuk Jamilah Anu, raban menteri, raban sapit menteri, raban pemesai ba pelilih menua nya, Kaban Kunsil Nengeri, Pemesai sereta Raban Tuai Komiti.