KUCHING: Pemutus nentuka bagi kompeni kontrektor ngaga projek Jalai Pan Borneo diputuska perintah besai, lalu perintah nengeri semina mantu bejalaika projek nya.
Menteri Pemansang Infrastruktur enggau Penyambung Dato Sri Michael Manyin Jawong madah,diatu bedau temu bagi kompeni kontrektor ti bejalaika projek nya.
Iya madah, projek nya ukai semina bisi kaul enggau sebengkah bansa aja baka ti dituduh Parti Tindakan Demokratik (DAP), tang mega bisi nyengkaum bansa bukai baka China ti tebal agi nyadi konsultan projek nya.
“Pemutus pasal projek ngaga Jalai Pan Borneo tu digaga di Kuala Lumpur, lalu opis menteri kami (Opis Menteri Pemansang Infrastruktur enggau Penyambung) semina nulung bejalaika projek tu.
“Lalu orang ti bekaul enggau projek tu ukai semina sebansa aja, konsultan mega bisi bansa China.
“Aku ngasaika sida (DAP) enda betanya dulu sebedau mansutka penemu,” ku iya lebuh dipinta meri penerang bekaul enggau jaku tuduh DAP Sarawak, ti madahka enda puas ati enggau chara meri projek nya.
Dalam surat kabar ensanus, DAP Sarawak enda puas ati enggau chara meri tauka magi projek ngaga Jalai Pan Borneo, ti dipadahka sida semina diberi ngagai sebansa aja.
Chairman DAP Chong Chieng Jen madah, projek ti berega RM27 biliun enggau jalai ke sepemanjai 1,663 kilometer nya semina diberi ngagai kompeni kontrektor 100 peratus bansa Melayu.
Chong madahka semua tujuh direktor dalam kompeni kontraktor nya bansa Melayu.
“Nadai seiku pan pengari ari bansa Dayak tauka China megai pengawa dalam kompeni nya,” ku Chong.
Kelimpah ari nya, Ketuai Sekretari Politik Kepala Menteri Abdullah Saidol madah, Chong ngaga penerang ti ulih ngerusak penyerakup kaul pupu bansa di nengeri tu.
“Iya (Chong) nuduh semina sebansa aja bejalaika projek Jalai Pan Borneo.
“Sekalika iya berani beentaruh ketegal nadai sebuah kompeni China deka enggau ngaga projek nya?,” ku iya.
Iya mega madahka Kepala Menteri meri ungkup belanja RM3 juta taun nyin kemari, lalu RM4 juta taun tu kelimpah ari perintah besai dikena mantu sekula China di nengeri tu, tang nadai meh orang politik Bumiputera begau madahka nya bechiping.
Ba Pengawa Bepilih Kaunsil Nengeri (PRN) enggau Besai ke sebedau tu raban bansa China mayuh nyukung DAP, tang perintah agi berundingka peminta sida lalu Kepala Menteri mega suah ngelalu ngambika enda ngumbai sida ‘Orang Datai’,” ku iya.
“Penerang ke dibantaika Chong ngayanka DAP nyau suntuk minta sukung ari raban bansa Bumiputera.
“Aku ngelalau Chong ngambika anang ‘bemain api’ lalu anang nguji ngerachun runding bansa Bumiputera laban aku pechaya enti udah kelalu balat tusah deka ditagang, ke menang nyadi abu ke alah nyadi arang, semua kitai rugi,” ku iya.
Menteri Kereja Raya Datuk Seri Fadillah Yusof ti deka endur betanya silik pasal pekara tu ensanus enda ulih ditelefon.