KUCHING: Peranak Sarawak diperansang ngambi pelajar teknikal enggau vokasyenal awakka ulih ngisi pengawa puang dalam bidang teknikal ti disedia di nengeri tu nyengkaum ba kompeni ti diempu Petronas.
Presiden SUPP Senator Datuk Dr. Sim Kui Hian madah, nya berindik ari penyampau peranak Sarawak ti mangku pengawa dalam bidang teknikal ba kompeni besai baka Petronas, mengkang kelalu mimit.
Iya madah, bepelasarka saut ngagai tanya iya maya aum Dewan Negara ti bekaul enggau penyampau peranak Sarawak ngisi pengawa puang ti disediaka ba kompeni ti diempu Petronas iya nya ba ASEAN Bintulu Fertilizer (ABF) bisi 86 peratus enggau Malaysia LNG (MLNG), bisi 78 peratus peranak Sarawak.
Ba ASEAN Bintulu Fertilizer (ABF) (86 peratus) nya nyengkaum Eksekutif 83 peratus; Pengurusan Teknikal 14 peratus; Pengurusan Bukan Teknikal 3 peratus, lalu ba MLNG (78 peratus) nya mungkur Eksekutif 85 peratus; Pengurusan Teknikal (14 peratus) enggau Pengurusan Bukan Teknikal 1 peratus.
“Penyampau peranak Sarawak ti ngisi pengawa nyadi Pengurusan Teknikal ba ABF enggau MLNG semina 14 peratus aja.
“Berindik ari pekara tu kitai minta peranak Sarawak ngambi peluang gawa dalam bidang teknikal. Peranak Sarawak diatu patut mayuh agi milih pelajar dalam bidang teknikal enggau vokasyenal ngambika ulih ngisi peluang gawa dalam bidang tu ba kompeni di menua tu empu.
“Kitai mega meruan ngansak dua buah kompeni ti diempu Petronas tu (ABF enggau MLNG) terus ngambi sereta meri peluang gawa ngagai peranak Sarawak,” ku iya mansutka pekara nya dalam sebengkah aum pengarang berita ditu, kemari.
Nitihku Dr. Sim dalam sesi saut tanya, iya minta Menteri Besai nerangka silik penyampau peranak Sarawak ti mangku pengawa nyadi Ketuai Sekreteri, Ketuai Direktor, Ketuai Opis ba semua opis menteri enggau ejensi perintah besai.
Nitihka saut nyentuk 12 March 2015, nadai seiku pan peranak Sarawak mangku pengawa nyadi Ketuai Sekreteri tauka Ketuai Direktor, tang bisi tiga iku ti mangku pengawa nyadi Sapit Ketuai Direktor ba renggat ejensi perintah besai.
“Aku ngasaika tu kebuah orang Sarawak enda tentu lantang ati. Semina tiga iku (Sapit ketuai Direktor) ari penyampau.
“Nya alai aku ngasaika kitai patut enggau naka ulih mangku pengawa besai (Ketuai Direktor enggau Ketuai Sekreteri,” ku iya ba aum pengarang berita ditu, kemari.
Kelimpah ari nya Dr. Sim mega madah, maya bejaku dalam aum Dewan Negara ke sama, iya madahka Fakulti Perubat Universiti Malaysia Sarawak (UNIMAS) ti ba tangga kelima entara universiti di menua tu ke patut udah bisi sepital kediri empu.
“Pengudah 20 taun ditumbuhka, Fakulti tu lalu nadai sepital kediri empu.
“Enggau penyampau 700,000 ribu iku peranak di Kuching, kitai ngembuan kurang ari 1,000 iti katil ba sepital, lalu enggau penembu Sepital Petra Jaya dalam kandang beberapa taun agi, kitai semina bisi 1,400 iti katil aja dibandingka enggau sepital di Kota Bharu di Kelantan ti bisi 1,600 iti katil ke ngembuan penyampau peranak urung 500,000 iku,” ku iya.