KUCHING: ‘House of Acasia’ enggau ‘Bamboo Gallery’ dua bengkah pekara ti ngerinduka ati orang ti datai ngagai Sarawak Timber & SMEs Expo 2015 ke diatur di Palan Konvensyen Borneo Kuching (BCCK) ditu, kemari.
Dipenyadi Menteri Pengatur Pengeraja Asal enggau Rampa Menua II, Datuk Amar Awang Tengah Ali Hassan ti ngarika Kepala Menteri, House of Acasia mandangka perengka rumah ke digaga ari kayu akasia lalu ‘Bamboo Gallery ‘mandangka perengka ke digaga ari buluh.
Sarawak Timber & SMEs Expo 2015 ke diatur Sarawak Timber Industry Development Corporation (STIDC) matak 400 buah ejensi ari dalam enggau luar menua muka bansal endur mandangka produk sida.
Menteri Muda Pemansang Industri Datuk Julaihi Narawi ba jaku pengelalu madah, expo taun tu disereta pengari ari menua Korea Selatan, Vietnam, India, China, Indonesia (Jepara enggau Kalimantan Barat), Sabah enggau Semenanjung Malaysia.
Ku iya, STIDC keran ngangkatka Sarawak nyadi palan pemansang industri ti bepelasarka kayu akasia ngaga produk baka ke jemari, mija, bangku enggau utai bukai.
“STIDC keran deka meda Sarawak nyadi palan pemansang produk ari kayu akasia ti dikearap ulih besemekih enggau produk bukai ba makit entarabansa.
“Kenyau ari taun 2013, unit pemansang enggau pemansik kitai udah tetemuka mayuh guna kayu akasia,” ku iya.
Ngenang sentang buluh, Julaihi madah sempekat ke disain entara STIDC enggau International Network for Bamboo & Rattan (INBAR) rambau pengerami nya, kemari deka nentuka buluh nyadi sebengkah agi utai tumbuh ke berega jemah ila.
Iya madahka tanah di nengeri tu sigi manah endur buluh tumbuh ke alai buluh mega mudah ditemu ba sebarang alai di nengeri tu.
“Buluh sebengkah agi pengeraja asal nengeri ti tau dikemansang ke lebih agi ba pengawa industri mit enggau jelan pemesai.
“Pansik ba sentang buluh ulih ngerembaika pemansang Institusyen ti bepelasarka industri nya ditu,” ku iya.