SIBU: Komiti Besai Parti Bersatu Rakyat (UPP) kemari bedanji bela setuju enggau penemu majak taluk nyukung pegai ketuai perintah Barisan Nasional (BN).
Penemu nya dibantaika rambau aum keterubah Komiti Besai UPP ke digulu raban ketuai enggau kaban komiti parti nya ari Kuching.
Aum nya betuaika Presiden UPP ke mega nyadi Menteri Wang Kedua, Opis Kaunsil Kandang Menua enggau Pemansang Raban Bansa Dato Sri Wong Soon Koh.
Sida bedanji terus taluk ngagai BN enggau mensia mayuh nadai bekira bansa, adat enggau pengarap.
Sida mega nyukung atur pengawa digaga Menteri Besai Datuk Seri Mohd Najib Tun Razak enggau Kepala Menteri Datuk Patinggi Tan Sri Adenan Satem.
Sida muji pemanah pengawa digaga Adenan ke dipeda lurus sereta disukung semua orang.
Maya aum nya, sida bisi ngerintaika lapan resolusyen pekara nyukung pengawa Adenan.
Sida ngutuk pengawa ke digaga Parti Bersatu Rakyat Sarawak (SUPP) ngagai sida nengah surat kabar China.
“UPP enda ngelaban pengawa ke digaga SUPP ke ngelar sida orang nadai beradat sereta nadai nemu meri terima kasih ngagai sida.
“Sida (UPP) enda bemunyi laban bebasaka raban bukai (parti serakup) dalam BN,” ku iya nengah sebengkah surat penerang ke di[ansutka ditu, kemari.
Ba pengawa milih chalun napi Pengawa Bepilih Kunsil Nengeri (PRN) tu ila, penerang nya madahka Adenan deka ngaduka pengawa nitihka pekara ke udah ditetap.
“Kami enda ngibuhka pekara ke suah disebut baka ketuai SUPP sentang isu milih chalun.
“Tambah mega, sehari tu (18 April) dalam surat kabar, Presiden SUPP Datuk Dr Sim Kui Hian madah sida mengkang ngembuan 19 kerusi lalu nadai seiti pan rarat ke bukai,” ku iya.
“Kami enggau belaya enggau SUPP.
Kami deka nejuka pemutus digaga nitihka pemintar Kepala Menteri dalam nentuka BN ulih menang besai,” ku iya.
Nangkan nya, Soon Koh madah bala ketuai UPP deka bebendar ngereja pengawa pengabis manah ngagai rayat.