Bemacham aktviti bisi diatur nyerumba Minggu Amanah Saham Malaysia 2015

0

Dikarang Judan Bungap //

KENANG KITAI: Muhyiddin begambar kenang begulai enggau Adenan sereta bala bukai.

SIBU: Sapit Menteri Besai Tan Sri Muhyiddin Yassin udah diberi basa bejadika Minggu Amanah Saham Malaysia 2015 (MSAM) ke diatur ba Dataran Bandar Sibu ditu, kemari.

Sama bela datai ngulu pengerami bejadi tu iya nya Kepala Menteri Sarawak Datuk Patinggi Tan Sri Adenan Satem, Sapit Kepala Menteri Datuk Patinggi Tan Sri Alfred Jabu Numpang, Menteri ba Opis Menteri Besai Nancy Syukri, Speaker Kunsil Nengeri (DUN) Datuk Amar Mohamad Asfia Awang Nassar, Menteri Wang II Dato Sri Wong Soon Koh enggau Sekretari Perintah Nengeri Tan Sri Datuk Amar Mohamad Morshidi Abdul Ghani.

Kelimpah ari nya, pengerami tu mega digulu Chairman Permodalan Nasional Bhd (PNB) Tun Ahmad Sarji Abdul Hamid enggau Presiden ti mega Ketuai Eksekutif Kumpulan PNB Tan Sri Dato Sri Hamad Kama Piah.

Program semilan hari berunggu ke diatur Permodalan Nasional Bhd (PNB) tu udah belabuh ari 19 April tu tadi.

MSAM renggat ke-16 tu disempulang enggau bemacham aktiviti ke bisi diatur baka pelajar beranakka puku kelimpah program pemandang ke digulu 40 penyereta baka Kumpulan PNB, ejen Amanah Saham Nasional Berhad (ASNB), ‘badan kawal selia’ enggau ejensi perintah enggau kompeni luar.

Sekeda program ke bukai iya nya program pemandang ‘hartanah’ enggau ‘permotoran’ ke diatur raban MSAM baka Maybank Mewarnai Dunia­ku, CCM Interschool Showdown, Jejak Pelabur Bijak NSB, Jejak Pelabur Cilik I&P, Cabaran Pengurusan Kewangan ASNB, Pertandingan Cendekiawan Muda PNB enggau Seminar ‘Perancangan Kewangan’.

Baka taun sebedau tu mega, program tu mengkang ngena rambai jaku ‘Pelaburan 360 PNB’ kelimpah MSAM 2015 tu mega nempa sejarah ba Malaysia Book of Records nyadi ‘Penganjuran Pameran Unit Amanah Paling Lama’.

Program MSAM tu kala diatur ba nengeri Sarawak ba taun 2010 suba di Kuching lalu mujur matak 187,000 iku mensia mayuh datai ngulu program tujuh berunggu nya.

Serak tu, PNB merambu deka matak urung 150,000 mensia mayuh di Sibu.

BERANDAU: Ahmad Sarji maya berandau enggau Muyhiddin.