Dikarang Chris Bishop //
Parti nya meruan ngetanka penemu lama tang naka diatu apin merambu sekalika masuk PRN tauka enda
KUCHING: Parti Bansa Dayak Sarawak (PBDS) Baru bedau mutus sekalika deka nganjung pengari bediri ba pengawa bepilih nengeri (PRN) tu ila tauka enda.
Sapit Presiden Patrick Anek Uren madah, parti nya diatu meruan ngetanka penemu ke dulu lalu bedau mutus sekalika deka nyukung Barisan Nasional (BN) tauka penyakal.
Iya netap, PBDS Baru deka berunding meri pemutus penunga kuing ba maya ti patut endur ngetas bajung.
“Taja pia PBDS Baru tetap nyukung sebarang polisi enggau pengawa ti patut dipejalaika perintah ke penguntung semua rayat nengeri tu.
“Ambika chunto baka pengawa nangkap penchuri kayu batang dalam kampung enggau pinta royalti 20 peratus ari asil minyak endang disukung PBDS Baru,” ku iya.
Nambahka nya, Patrick mega madah, parti nya bedau merambu numbuhka pampang baru tang pengawa ngerijista orang nyadi kaban PBDS Baru endang deka dipejalai.
Presiden PBDS Baru Louis Jarrau mega ngarapka bansa Dayak meri sukung ngagai sida lalu iya netapka semua peranak bansa Dayak endang dikelalu masuk nyadi kaban.
Hari Enam tu tadi, komiti PBDS Baru bisi ngatur aum lalu netapka pekara ke disebut diatas.
Bela datai rambau aum nya Sekretari Besai James Jalai, Mandal Presiden I Teresa Stefanie, Mandal presiden II Dr Elli Luhat enggau komiti bukai baka Maria Retikos, George Gayau, Bobby William, Anthony Nais enggau Cobbold John.