Pengawa beranakka puku dalam ASNB nyaup nyungkak pemansang ekonomi menua

0

SIBU: Sukung rayat nengeri tu ba pengawa beranakka puku ba Amanah Saham Nasional Berhad (ASNB) balat nyungkak pemansang ekonomi menua iya nya urung 4.2 peratus ba taun 2013.

Kepala Menteri Datuk Patinggi Tan Sri Adenan Satem madah, penatai pemisi rayat di nengeri tu mega nyau majak manah sereta tikas penyeranta sida mega udah majak nurun.

Iya madah, pengawa ke milih Sarawak nyadi palan ngatur program Minggu Amanah Saham Malaysia (MASM) chukup manah laban peluang dikena ngiri penemu ngagai rayat di nengeri tu sentang pemesai reti pintar ngatur belanja enggau beranakka puku.

“Permodalan Nasional Berhad (PNB) ukai semina ngaduka pekara duit tang mega ngajar mensia mayuh chara ngatur belanja.”

“Aku pechaya nengah langgur ke manah sereta sukung ari perintah nengeri enggau perintah besai, Sarawak deka majak mansang ngerembai,” ku iya.

Iya madah munyi nya rambau pengerami MSAM 2015 ke dipenyadi Sapit Menteri Besai Tan Sri Muhyiddin Yassin.

Sama bisi datai Sapit Kepala Menteri Datuk Patinggi Tan Sri Alfred Jabu, Menteri Wang II Dato Sri Wong Soon Koh, Chairman Permodalan Ahmad Sarji Abdul Hamid dan Presiden enggau Menijar Opis PNB Dato Sri Hamad Kama Piah.

Kenu ku Adenan, nadai kebuah rayat nulak produk ke disediaka PNB.

Kebuah pia laban PNB ngembuan rikod ke manah sekalika ba penyampau bayar dividen enggau bonus ninting taun.

“Kelimpah nerima anak puku urung enam peratus, mensia mayuh ke bisi beranakka saham mega bisi nerima untung asil ari rega saham ke niki,” ku iya.

Nangkan nya ku iya, beguna amat sebagi ari penatai pemisi patut disimpan ngambika bisi beranak nyadika puku.

Iya madah, peluang beranakka puku disediaka PNB nadai tatak ba ASB enggau ASN.

Nya alai, rayat di nengeri tu patut nyimpan mayuh puku sida ba Amanah Saham Bumiputera , Amanah Saham 1 Malaysia enggau Amanah Saham Bumiputera 2.

Adenan madah, puku tu nyadika penambat dudi hari lalu iya ulih dikena ungkup pekara pelajar, meli tauka ngaga rumah sereta dikena berubat.