SIBU: Permodalan Nasional Berhad (PNB) udah mujur megai 12.31 juta akaun orang beranakka puku enggau penyampau 202.23 billion unit, naka bulan Februari 2015.
Sapit Menteri Besai Tan Sri Muhyiddin Yassin madah, enti agi 15 taun sebedau tu, PNB semina bisi 7.8 juta orang beranakka puku enggau penyampau 36 billion unit.
“Tu penyampau ti chukup besai ba institusi beranakka puku rayat kelimpah tau nyungkakka agi pemansang ekonomi menua baik nya nengah deposit bank, saham tauka bon enggau macham bengkah ke bukai agi,” ku iya.
Iya mantaika jaku tu maya bejadika Minggu Amanah Saham Malaysia 2015 (MSAM) ke diatur ba Dataran Bandar Sibu ditu, kemari.
Sama bela datai ngulu pengerami bejadi tu iya nya Kepala Menteri Sarawak Datuk Patinggi Tan Sri Adenan Satem, Sapit Kepala Menteri Datuk Patinggi Tan Sri Alfred Jabu Numpang, Menteri ba Opis Menteri Besai Nancy Syukri, Speaker Kunsil Nengeri (DUN) Datuk Amar Mohamad Asfia Awang Nassar, Menteri Wang II Dato Sri Wong Soon Koh enggau Sekretari Perintah Nengeri Tan Sri Datuk Amar Mohamad Morshidi Abdul Ghani.
Kelimpah ari nya, pengerami tu mega digulu Chairman Permodalan Nasional Bhd (PNB) Tun Ahmad Sarji Abdul Hamid enggau Presiden ti mega Ketuai Eksekutif Kumpulan PNB Tan Sri Dato Sri Hamad Kama Piah.
Ku iya, pemujur nya mega ngayanka PNB mujur ngerandang jalai ngagai rayat baikka Bumiputera tauka enda bela ngempu pengaya menua tu.
Iya madah, agi empai bisi institusi beranakka puku baka PNB, rayat bepenanggul ‘mega’ institusi besai.
“Institusi beranakka puku enggai rayat tu beranakka puku ba macham bengkah sektor baka servis wang enggau insurans, automotif, kebun dandang besai enggau mayuh agi ke bukai.
“Penguntung tu deka pulai lebih agi ngagai Bumiputera alai sida ulih megai awak pengawa ke manah tauka profesional megai sektor besai baka nya,” ku iya madahka baru.
Muhyiddin madah, ba industri unit ‘amanah, naka bulan Januari 2015, udah bisi 17.47 juta orang beranakka puku enggau penyampau 446.63 billion unit.
Iya madah, penyampau tu jauh niki enti dibida enggau 9.6 juta orang beranakka puku enggau penyampau 63.9 billion unit, 15 taun sebedau tu.
“Ari penyampau sida ke megai akaun, PNB mujur megai 70.2 peratus lalu ari tikas aset iya nya 63.6 peratus ujung taun seiti tadi,” ku iya madahka baru.
Ngenang program MSAM nya, iya madah, program nya jauh lebih nyulut ari program ke bukai ngelama tu.
Program tu ku iya, lebih agi ngemeratka pelajar pengawa beranakka puku mensia mayuh enda ngira tikas umur, bansa enggau gaya pengidup.