KUCHING: Librari Nengeri Sarawak (LNS) deka ngatur ‘Program Jom Baca Bersama Untuk 10 Minit’ nyerumba ‘Hari Buku & Hakcipta Sedunia 2015’ kena 23 April di LNS ditu.
Program ‘Jom Baca Bersama Untuk 10 Minit’ nyadi program ke-2 diatur di serata menua Malaysia.
Terubah iya diatur taun 2014, lalu tuju iya dikena meransang mensia mayuh rinduka pengawa macha.
Ketuai Pegawai Eksekutif Pustaka Negeri Sarawak Rashidah Bolhassan madah enti kitai jenuh dalam kandang 10 minit nya, taja pan ngirup kopi aja, macha lebuh maya ngetu deriba.
“Macha tauka mendingka bup audio maya deriba kerita, nya pan sebagi ari pengawa macha,” ku Rashidah madah maya ngulu aum media beserimbai enggau ‘Program Jom Baca Bersama Untuk 10 Minit’ di Bilik Aum Librari Nengeri Sarawak ditu, kemari.
Taun nyin tadi, program tu chukup mujur sereta nerima timbal ke manah ari mayuh bengkah ejensi sereta mensia mayuh.
Taun 2014, urung 2.5 juta rayat Malaysia nyereta program tu ke diatur di serata menua Malaysia.
“Nya alai, taun tu semua palan macha di menua tu sekali agi deka ngatur pengawa tu bereta kena hari Empat, 23 April 2015 belabuh pukul 10 nyentuk 10.10 pagi.
“Maya nya, semua penyereta enda ngira pengawa sida iya tauka aktiviti, sida deka sama ngetu ngereja pengawa lalu macha kandang 10 minit nya,” ku iya.
Iya nandu, kena ngayanka sukung ba program tu, mensia mayuh diperansang nganjung gambar benung macha, enggau chara naip #lanbaca2015 ba laman rama Facebook, Twitter tauka Instagram diri empu.
Mensia mayuh ke deka nemu pasal pekara tu enggau silik, tau telefon nuju Muhamad Ali Abdul Wahab tauka Razak Rambili nengah lumur 082-442000 sambung 342/348 tauka emel muhamaaw@ sarawak.gov.my/razakr@ sarawak.gov.my tauka ngelawa laman web Pustaka Negeri Sarawak www.pustakasarawak. com tauka Facebook: pustaka.sarawak/Twitter: pustakaswk.
Kelimpah ari nya mega, Rashidah madah Pustaka Negeri Sarawak mega deka ngatur sebengkah program ngangkatka pengawa macha ba anak mit, alai sida iya deka bekerejasama enggau sepital tauka klinik Perintah tauka peribit.
Nangkan ke nya, ku iya, anak mit tu deka dirijista enggau librari ngambika apai indai sida ulih nginjau bup ari palan nya.
Nya kebuah, palan macha patut bisi nyendiaka bup ungkup anak mit, ku iya.
Projek tu dijangka deka dipenyadika ujung taun tu ila lalu taun 2016 deka nyadi sebengkah projek besai Librari Nengeri Sarawak.