STIDC, INBAR bekunsi penemu ngemansangka industri buluh

0

Dikarang Chris Bishop //

PEMANAH BULUH: Tu gaya ‘Bamboo Galery’ ke bisi dipandangka di BCCK ditu.

ARI PENGELANDIK MAGANG: Produk asil ari pengelandik jari bepelasarka buluh.

KUCHING: Keterubah diatur maya ‘Sarawak Timber & SMEs Expo 2015’ di Palan Aum Besai Borneo Kuching (BCCK) ‘Bamboo Galery’ mandang sereta meri macham penerang senentang pemesai reti enggau guna buluh ngagai mensia ke ngelawa palan nya.

Maya nya mega ‘Sarawak Timber Industry Development Corporation’ (STIDC) ke nyadi pengatur expo udah nyain sempekat enggau ‘International Network for Bamboo & Rattan’ (INBAR).

Sempekat deka nentuka pansik enggau pemansang sentang pun buluh deka dipejalaika enggau chakah agi lalu dikearap ulih ngangkatka pengeraja asal menua tu nyadi sebengkah dagang jemah ila.

Menteri Muda Pemansang Industri Datuk Julaihi Narawi ba jaku pengelalu rambau pengawa bejadika expo netapka perintah nengeri deka bejalaika kerejasama enggau menua China sentang pemansang nanam buluh.

Julaihi pechaya buluh ulih dikemansang nyadi sebengkah agi produk ti tau ngenataika pemisi ekonomi ketegal pemayuh utai tumbuh tu di kampung Sarawak.

Ku iya, tanah enggau gaya hari nengeri tu senipak enggau pengidup pun buluh.

“Dikena ngangkatka industri buluh, STIDC sereta ejensi ke bekaul dalam menua tu deka bejalaika kerejasama enggau menua China.

“Industri buluh majak ngerembai ba makit dunya lalu udah ba tikas USD15 nyentuk USD20 biliun manggai taun 2018 ke alai pinta tebal agi datai ari menua Amerika.

“Buluh nyadi sebengkah utai tumbuh ti jampat besai lalu nyadi sebengkah agi pengeraja asal ti beguna ungkup indusri mit enggau jelan pemesai (SME) di nengeri tu,” ku iya.

‘Sarawak Timber & SMEs Expo 2015’ dipenyadika Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan ti ngarika Kepala Menteri.

Entara bansa buluh ke suah ditemu kitai di menua tu iya nya buluh betung, petung cina (Bidayuh), buluh aur (Malaysia), buluh galah (Malaysia), buluh jawa (Malaysia), buluh engkalat (Iban/Bidayuh), buluh pisa (Bidayuh), buluh piring (Malaysia) enggau buluh baloi (Iban/Bidayuh).

Ngelama ke udah, perengka rumah udah mayuh digaga ari buluh kelimpah ari dikena ngaga produk ti bepelasarka pengelandik jari.

Buluh mega ngasilka produk pemakai baka achar, tubu kitai Iban sereta mega digaga ke sambal ti udah dibungkus enggau manah lalu bisi dijual. Arang buluh mega bisi dijual di makit.

Expo taun tu bisi besai agi ari ke udah lalu mujur matak 400 ejensi datai mandangka produk sida lalu nya nyengkaum ari menua Korea Selatan, Vietnam, India, China, Jepara enggau Kalimantan Barat, Sabah enggau Semenanjung Malaysia.

ARI PENGELANDIK MAGANG: Produk asil ari pengelandik jari bepelasarka buluh.