KE PENGINGAT: Raban nembiak sekula, raban pengajar sereta raban MDS bela sama begambar pengudah program tu tembu ditu apin lama ti udah.
SARATOK: Bisi 100 iku raban nembiak sekula ngulu Program Komuniti Ngiga Pesaka Tuai diatur begulai Kelab Pra-Universiti Sekula Sekondari (SMK) Bahasa Malaysia Saratok enggau Opis Pelilih Mit Saratok (MDS) bepalan ba Bangunan Lama, Kubu Ranee, Bangunan Pesaka Tuai Saratok ditu apin lama ke udah.
Sebedau nya, pengawa bejadika program tu udah dipenyadika Sapit Chairman Opis Pelilih Mit Saratok (MDS), Kaunselor Ayum Kinyeh.
Pengari pengatur pengawa tu lebuh maya dirandau madahka, batang pengawa program tu diatur iya nya ngechat bangunan pesaka tuai tu dikena meri peluang ngagai raban orang ke belajar ba pra-universiti nelebaka diri nyereta program ba peringkat pelilih mit menua iya ke bulih pemendar ari Opis Pelajar Pelilih Mit Saratok.
Kelimpah ari nya ku iya, program tu ngasuh raban nembiak Pra-universiti meri bantu enggau enda bebayar ngagai komuniti di Saratok.
Pia mega, raban nembiak tu ulih meri bantu ke patut ngagai raban mensia mayuh enggau menua kitai sereta pengawa ke manah bakatu tau ngadaka raban orang ke ngembuan tanggungpengawa ngagai raban mensia mayuh enggau menua.
“Pengawa ke bansa tu dikearap deka terus bulih sukung ari raban Opis Pelilih Mit jemah ila,” ku iya.
Program tu berengkah ari pukul 8.30 pagi sereta tembu urung pukul 12.00 tengahari, ke udah ngatur pengawa ngechat bangunan pesaka tuai, lalu pengawa tu mega udah digulu raban pengajar ari SMK BM Saratok enggau raban MDS.