NHRC ‘one-stop centre’ ungkup kompeni SME

0

KUCHING: National Human Resource Centre (NHRC) tau nyadi palan ‘one-stop’ ke kompeni dagang mit enggau jelan iya pemesai (SME) ke betapi enggau penanggul ngatur pengereja pengawa ba kompeni sida.

Konsultan Unit Advisory HR, Tan Say Pooi madahka NHRC nyadi palan ‘one-stop’ Opis HR laban tebal agi ari SME ngaga pengawa dagang nadai opis HR.

“Dalam pekara bekaul enggau pengawa dagang SME, kekadang kitai berunding bakani ku chara aku deka bejalaika dagang ke tau mai penguntung?

“Lalu baka nya mega enggau pekara ke bekaul enggau HR, ke alai mayuh kompeni SME, nadai opis ke endang bejalaika pengawa HR,” ku Tan.

Dalam kes tu ku iya, NHRC ulih nyaup ngatur pengereja pengawa laban baka kompeni SME nya tebal agi nadai seksyen HR dalam kompeni nya.

Enti diperatika, HR suah agi nadai dalam kompei SME. HR tu tebal agi bekaul enggau pengawa ngaduka gaji aja, engka nya kebuah seksyen HR nadai dalam kompeni SME.

Kekadang pengawa opis begulai sekali enggau Opis ke bekaul enggau pekara wang, ku iya.

Iya madah munyi tu lebuh dikerandau maya Ekspo Sarawak Timber enggau SMEs 2015 ti belabuh diatur ari 17 – 20 April tu tadi.

Nya alai ku iya, enti sema SME begunaka bantu dalam pekara HR, sida tau minta bantu ari NHRC.

“Kami mantu sida iya mansang sereta ngemansang pengerejaka pengawa ba kompeni SME,” ku iya.

“Pengawa kami nyadi Opis HR ke semua SME di Malaysia, reti nya, enti sema kompeni bisi penanggul dalam isu HR tauka penanggul bukai, sida tau ngagai NHRC, lalu kami deka meri sida jaku lalau tauka servis konsultan nitihka peneka sida iya,” ku iya.

Diatu ku Tan, portal sida bisi mantaika mayuh macham dokumen ke patut bekaul enggu HR.

“Ambika chunto, enti kompeni nya deka ngambi orang gawa, lalu deka meri surat ngambi orang gawa, kami bisi surat chunto ke tau nyadika lalau sereta tau diubah nitihka penengkeman ba sida.

“Lalu enti sida iya deka neritka atur disiplin, bisi mega disediaka ‘Employment Act in Malaysia’ sereta ‘Labour Ordinance’ di Sabah enggau Sarawak. Bisi atur ke patut dititih ngambi orang gawa, ngambi atur disiplin, sereta mayuh agi pekara bukai. Semua tu bisi chunto ke ulih diambi ari portal kami,” ku iya.

Kelimpah ari nya, kompeni SME mega tau betelefon ngagai Toll-Free Line sid nengah lumur 1 800 88 4800. Enti sema kompeni bisi betapi enggau dokumen HR, sida iya tau betelefon ngagai lumur nya ngambika konsultan HR madah chara ngagai sida.

“Kompeni SME tau mega minta betemu sereta minta saup kami chara mutarka sekeda isu HR laban bisi konsultan ba opis kami ke tau meri servis ngagai kompeni nya,” ku iya.