Sitak ti dikeinginka parti nya dikena nambahka lima penuduk ti endang dikembuan lima iku pengari rayat
KUCHING: Parti Tenaga Rakyat Sarawak (TERAS) nganyanka penenguk ba dua tauka tiga sitak Kunsil Nengeri (DUN) ungkup chalun parti nya ba Pengawa Bepilih Kunsil Nengeri (PRN) dudi tu ila.
Presiden parti nya Tan Sri William Mawan Ikom madah, TERAS diatu udah ngaga pemutus bepilih ba lima iti sitak DUN ti disandang pengari rayat ari parti nya.
Lima iti penuduk nya, Pakan ke dipegai iya empu, Tasik Biru (Datuk Peter Nansian Ngusie), Marudi (Datuk Sylvester Entrie Muran), Bekenu (Rosey Yunus) enggau Batu Danau (Paulus Palu Gumbang)
“Engka kami mandangka penenguk ba dua tauka tiga sitak maya PRN ti diuan mayuh bengkah pupu raban bansa.
“Ungkup TERAS, kami udah bisi pengari ba lima iti penuduk, nya ti dikemeranka pengari rayat kami nyengkaum aku empu maya PRN ila,” ku iya lebuh ti dikerandau pengarang berita pengudah Pengerami Istiadat Muka Penggal Kelima Aum Kunsil Nengeri (DUN) Ke-17 ditu, kemari.
Mawan ke mega Menteri Pemansang Rama enggau empat iku pengari rayat udah numbuhka TERAS taun seiti nyin tadi, ke mega pambar ari Parti Demokratik Progresif Sarawak (SPDP) ketegal charut pasal nyadi ketuai dalam SPDP.
Lebuh ke ngenang sentang pengawa Presiden SPDP, Datuk Seri Tiong King Sing ti mantaika nama enam iku chalun apin lama ke udah, Mawan madahka pemutus ngeletakka seseiku chalun ti dikearap ulih menang tepulai ngagai ketuai besai Barisan Nasional (BN).
“Ngelama tu nya tepulai ba Kepala Menteri nentuka chalun ti ulih menang enggau chalun ke tau betanding, iya ti ulih dikearapka iya (Kepala Menteri).
“Aku udah dikearapka ngaga pemutus ke penudi endar, nya alai kami (TERAS) enggai bejakuka pekara tu kelalu tumu,” ku MP Saratok nya.
Berebak enggau nya, jaku Tiong ti diambi ari Benama kemari madah, enam nama ti dibantaika maya Pengerami Makai Lemai SPDP tu kemari ukai chalun ke tetap deka ngarika parti nya maya PRN tu ila.
“Kami deka majak beratika sida dalam timpuh dua bulan agi nya baru ulih ngenukuka sida bisi peluang menang,” ku iya.
Ku Tiong, SPDP deka betanding ba lapan iti penuduk maya PRN lalu chalun ti udah dikelala parti nya baka Cila Nasu ba sitak Tasik Biru, luyar Kilat Beriak (Krian), jurukur Belayong Jampong (Meluan), seiku orang dagang Brian Fung enggau luyar Fabian Sigar Andrew (Ba’Kelalan).