Dikarang Chris Bishop //
Bup nya nusui macham pengawa dagang ke tau diperebutka orang dagang di serata dunya tu
MUJUR DIPENYADI: Taib nekan ‘switch’ simbolik kelai bejadika bup ‘Sarawak Report’ 2015 seraya dikemata Adenan (dua kanan) sereta sida bukai maya atur pengawa nya.
KUCHING: Bup ‘Sarawak Report’ 2015 mujur dipenyadika Tuai Pemegai Menua (TYT) Tun Pehin Sri Abdul Taib Mahmud ditu, kemari.
Pengawa bejadika bup tusun ketiga ke digaga Oxford Business Group (OBG) nya diatur di Dewan Undangan Negeri (DUN) berebak enggau Aum DUN ba hari ketiga.
‘Sarawak Report’ 2015 nusui bengkah pengawa ti udah nyaup ngangkatka ekonomi Sarawak nyengkaum pengawa betanam betupi, pengawa begaga rumah, jalai alun, pengawa dagang sereta industri bukai.
Managing Editor OBG (Asia) Paulius Kuncinas ba aum pengarang berita pengudah atur pengawa nya madah, bup nya dikarang ungkup orang dagang enggau kompeni ba dalam sereta luar menua ti deka ngerebut awak dagang di Sarawak.
Ku iya, bup mungkur semua pengawa industri enggau dagang bukai ke diperambu sereta benung diatur di nengeri tu.
“Bup nya mega nerangka guna Sarawak ngatur kaul dagang diserata dunya ba mayuh macham bengkah pengawa.
“Kebuah pia, Sarawak ulih nyadi kuasa besai dalam pengawa dagang di Pulau Borneo enggau Asia Tenggara,” ku iya.
Nambahka nya, Paulius madah SCORE diatu udah nyadi palan industri ke pemadu chakah ba menua tu.
Penyampau orang dagang beranakka puku enggau numbuhka industri ba kandang SCORE pemadu mayuh di Malaysia sereta majak nambah, tandu iya.
Iya mega madah bekal kuasa lekterik ke murah ungkup industri udah nyadika kebuah SCORE dikerinduka raban pengawa industri serata dunya.
Bela datai maya atur pengawa nya, Kepala Menteri Datuk Patinggi Tan Sri Adenan Satem, Sapit Kepala Menteri Datuk Patinggi Tan Sri Alfref Jabu, Sekretari Perintah Nengeri Tan Sri Datuk Amar Mohamad Morshidi Abdul Ghani.