TYT ngelalau rayat di nengeri tu terus ngemeranka pemanah kaul

0

KUCHING: Tuai Pemegai Menua (TYT) Negeri Sarawak Tun Pehin Sri Taib Mahmud ngelalau mensia mayuh di nengeri tu ngemeranka ulah bela bebasaka pangan diri sereta negapka penyerakup pupu raban bansa baka ke dipinta bala pemesai menua kenyau menua tu merdeka kelia.

Taib maya munyi nya maya bejadi Aum Kunsil Nengeri ke-17 kena Hari Dua tu tadi.

Nangkan ke nya, Kaban Kunsil Nengeri (ADUN) Batu Danau Paulus Palu Ngumbang madah pengawa ngangkatka penyerakup nya ukai muntang laban iya begunaka pengeransing, ayu penyerakup entara pupu raban bansa sereta pemendar enggau penyiru ba genap iku pemesai menua.

“Pengawa kitai ke nyadi rayat sereta tuai pemesai menua di renggat menua nyapai tuju tu, majak mayuh laban kekadang bisi pekara bekait enggau pengarap sereta bansa seruran dibantai sereta dikelikuhka sekeda orang ke enda betanggungjawab kelebih agi di Semenanjung Malaysia, laban semina ngemeratka pemerat diri empu,” ku Paulus.

Iya madah munyi nya lebuh mantaika debat iya bekait enggau Jaku TYT di Aum Kunsil Nengeri ke-17, Hari Ketiga di Kunsil Nengeri ditu, kemari.

Berindik enggau pekara nya, ku Paulus, iya meri terima kasih sereta meri jaku selamat ngagai Perintah Nengeri baruh pegai Kepala Menteri ketegal pengawa iya ke betatika nyaga pemerat pengarap sereta bansa mensia mayuh di menua tu.

“Ambika chunto, kitai seruran mendingka jaku Kepala Menteri ke suah endar nyamin komuniti Keristin di menua tu tau ngena jaku ‘Allah’ peneka ati sida iya nitihka pemerat ke patut.

“Nyengkaum nya mega, pemerat jamin, iya nya ‘Undang- undang ‘Hudud’ enda dikemendarka di menua tu. Aku ke bepengarap Keristin, berasai gaga amat ati ke pemanah ati sereta jamin Kepala Menteri nya. Pelaba aku, komuniti Keristin di menua tu mega berasai lantang ati ninga jaku ari Kepala Menteri.

“Enti nitih, atur ke tebuka bansa tu ke meri bida Sarawak enggau sitak menua bukai dalam menua tu, kelebih agi bekait enggau basa entara pupu bansa di nengeri tu,” ku iya.