TERIMA KASIH: Ambrose betabi enggau Nanta kelai meri terima kasih laban ke udah datai ngulu program nya.
KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi madah pekara disiplin enggau pengeransing belajar nyadika kunchi pemujur ngagai bala nembiak sekula ke deka nyulut dalam bidang pelajar.
Kelimpah ari nya, iya muji raban apai indai nembiak ke bisi datai ngulu Aum Besai Ninting Taun Gerempung Apai Indai enggau Pengajar (PIBG) Sekula Sekondari (SMK) Kapit.
Iya meri besai terima kasih ngagai raban apai indai nembiak ketegal sukung sida ngagai PIBG sereta penatai sida ngagai aum tu majak nambah ku iya ba pengawa tu kena Hari Enam tu tadi.
“Aku berasai gaga ati laban raban apai indai nembiak udah mereti ba tanggungpengawa sida nyaup raban pengajar sekula tu ngemansangka pekara pelajar anak sida.
“Kitai meseti seruran ngemataka ulah nembiak ba sekula tu ngambika manah agi.
Ba polisi perintah pan ngansak raban tu bejalaika tanggungpengawa sida baka ba kandang nengeri tauka ba menua pesisir ngambika anak sida enda tinggal dalam pelajar,” ku Nanta bejaku lebuh ngulu pengawa PIBG sekula nya.
Iya madah tajapan sekula tu udah niki ari sukut pemutus peresa ke manah, tang mayuh agi batang pengawa ke patut diperati sereta dikereja dikena ngemanahka agi sekula tu.
Ku iya, Pelilih Mit Song udah megai tangga lumur satu ba UPSR lalu sekula ba Kapit tu patut bebendar agi maya peresa ke deka datai.
“Ngagai raban pengajar, aku minta sida bebendar agi ngereja tanggungpengawa sida sereta patut ngemeranka pekara pelajar anak,” ku iya.
Iya mantaika tanda terima kasih ngagai raban pengajar ke datai ari kandang nengeri ke udah nyanggup diri ngajar ba sekula ke jauh baka nya.
Iya madahka dunya tu udah mayuh berubah. Dulu menya raban nembiak ke bisi pemandai ba Pom Tiga enggau Pom Lima aja tau bulih pengawa ke menyana.
“Diatu nembiak patut ransing ati ngemeranka pengawa belajar lalu nyambung pelajar sida ngagi tikas degree.
“Naka ke diatu, peluang nyambung pelajar mayuh disediaka baka ba palan pelajar tinggi, kolej vokasional enggau kolej teknikal ke mega bisi nyendiaka bantu pelajar tauka sekularship.
Raban ari ejensi MARA baka Maktab Rendah Sains Mara tu tau nyadi seiti palan nyambung pelajar ke manah kelebih agi ngagai nembiak di Kapit.
Rambau program nya Nanta bisi madah diri deka ngungkupka duit bantu RM20,000 ngagai PIBG SMK kapit.
Dulu agi ari nya, Chairman PIBG SMK Kapit, Ambrose Abong Bugek mesan bala apai indai nembiak terus nyaup bala pengajar ngemansangka pekara pelajar anak sida.
“Raban apai indai nembiak patut ngemeranka pekara pelajar anak sida enti sema sida enggai tinggal ba pekara nya.
“Disiplin ke manah enggau ransing belajar, dua bengkah pekara ke nyadi kunchi pemujur dalam bidang pelajar.
“Raban apai indai enggau pengajar patut nemu tanggung pengawa sida sereta nembiak patut ngembuan ulah ti manah sereta mendingka jaku ajar ari apai indai enggau pengajar sida enti deka bulih pemujur,” ku iya.
SMK Kapit ngembuan 136 iku pengajar sereta 1700 iku nembiak ari kelas Pemulihan nyentuk Pom Enam,” ku iya.
Bela bisi bejaku lebuh maya aum tu iya nya Prinsipal Manggie Nyegang.
Bela sama bisi datai Sekretari Politik Kepala Menteri Sarawak, Jefferson Jamit Unyat, Mandal Chairman PTA Kuiek Bon Siau, Sekretari Freddy Mike Engkamat, sereta penulung iya Florena Galau, Tukang Wang Ana Rantai.