KUCHING: Kunsil Nengeri (DUN) Sarawak kemari udah ngemendarka ungkup belanja pemansang taun 2015 ti sepenyampau RM780 juta, pengudah perambu Undang-undang Perbekalan Perbelanjaan (2015), 2015 dikemendarka ba bacha kali ketiga.
Ungkup belanja nya ti dipejuraika Menteri Wang Kedua Dato Sri Wong Soon Koh seraya madahka penyampau belanja nya RM780,252,456 (lebih RM780 juta) enggau tuju ti nadai diungkup tauka enda chukup diungkup dalam Anggaran Pembangunan Utama 2015.
“Belanja tambah nya (lebih RM780 juta) diungkupka ke belanja kena bangunan perintah sepenyampau RM3.5 juta, Utiliti Awam (RM24.9 juta), Ngemesai enggau mayar pampas tanah (RM8.7 juta), pemansang menua pesisir (RM34.2 juta), Kewangan Awam (RM649 juta) enggau ngemansangka baru genturung pendiau RM59.9 juta,” ku iya.
Lebuh ti bejuraika perambu belanja nya iya madahka dibaruh bangunan perintah sepenyampau RM3.5 juta belanja tambah dikena ngintu Kunsil Nengeri baru.
Di baruh Kewangan Kerajaan ku iyu, sepenyampau RM649 juta diungkupka ngagai Sekretari Wang Nengeri dikena pengawa mantu, servis enggau pengawa enggau nyengkaum Projek Mit Menua Pesisir (MRP).
“Projek MRP ungkup belanja dalam jangka iya nya RM655,900,00 lalu belanja tambah ti diguna iya nya RM250 juta.
“Penyampau belanja RM250 juta tu dikena bejalaika projek transformasyen menua pesisir laban tu sebengkah inisiatif perintah dikena ngangkatka pemansang menua pesisir serata nengeri.
“Pengawa mekuh ngagai pemansang menua pesisir tu, dia kitai ulih ngurangka takah pemansang entara mengeri enggau menua pesisir seraya ngangkatka kualiti pengidup peranak menua pesisir ngambika senipak enggai mengeri,” ku iya
Bejaku baru ADUN Bawang Assan nya madahka ungkup bajet ke diatu enda chukup dikena perintah bejalaika inisiatif ti dikearapka.
Kelimpah MRP entara dibaruh Belanja Perintah iya nya Wang Turu Pemansang Khas ti diungkupka enggau urung RM500,000,000 enggau belanja tambah ti diguna RM250,000,000.
“Belanja tambah RM250,000,000 nya dikena bejalaika program tauka projek pemansang enggau rama,ti lebih mekuh ngagai kandang menua pesisir dikena ngenyampatka agi projek pemansang menua pesisir di serata nengeri tu,” ku iya.
Iya madahka jangka agih belanja ungkup Pemansang Tambah Keterubah 2015 nya ti udah dikemendar deka diagihka ngagai opis menteri ti bekaul ngambika ulih dikena bejalaika program enggau projek.
Ungkup belanja nya diagihka ngagai Opis Menteri Pemansang Infrastruktur enggau Penyambaung sepenyampau RM3.5 juta, Opis Menteri Perengka Guna Mensia Mayuh (RM24.9 juta), Opis Menteri Pengatur Pemansang Pengeraja Asal enggau Rampa Menua (RM8.7 juta), Opis Menteri Pemansang Menua Pesisir (RM34.17 juta), Sekretari Wang Nengeri (RM649 juta) enggau Opis Menteri Pengawa Berumah (RM59.97 juta).