KUCHING: Kaban Kunsil Nengeri (ADUN) Opar Ranum Mina minta Opis Menteri Dagang Dalam Menua , Koperasi enggau Pekara Bebeli Barang (KPDNKK) ransing agi meri penerang ngagai mensia mayuh ke lebih agi ti diau ba menua pesisir sentang sistem chukai Barang enggau Servis (GST).
Ranum pechaya mengkang mayuh peranak nengeri, tebal agi sida ke diau di menua pesisir mengkang enda meretika sistem GST.
“Mayuh peranak menua pesisir enda meretika sistem GST lalu ngujungka sida mudah ditipu orang dagang.
“Sida enda nemu bagi barang ke diletak chukai tauka enda lalu ketegal nya orang dagang beambi ulih sentang pekara tu.
“Diatu semua rega barang nyengkaum sayur udah niki ke alai sekeda ditiki sengapa,” ku iya.
Ranum mansutka jaku tu rambau aum Dewan Undangan Negeri (DUN) Ke-17 di Dewan Kunsil Nengeri, ditu kemari.
Ngenang kaul bukai, Ranum ngansak perintah ke lebih agi Opis Pelajar ngemeratka pengawa ngemanahka sekula ke udah buruk di menua pesisir.
Beambika chunto SK Bokah di Lundu, iya madahka sekula nya udah enda likun diani lalu patut dikemanah enggau lekas.
Ranum mega minta Opis Pelajar ngemanahka SM Senibong ke benung digaga diatu nyadi sekula endur ngempuru semua nembiak Form 6 ari Pelilih Bau enggau Lundu.
“Nengah chara tu pengawa meri pelajar ngagai sida ulih dipejalai teatur agi,” ku iya.