Dikarang Chris Bishop//
KUCHING: Petronas udah meri kontrek ti manggai RM65 juta ungkup tiga bulan keterubah 2015, ngagai 80 buah kontrektor ari Sarawak kemari.
Pengawa nyuaka kontrek nya dikemujur Kepala Menteri Datuk Patinggi Tan Sri Adenan Satem sereta disempulang Chairman Petronas, Tan Sri Sidek Hassan.
Enggau nya, Petronas ngamatka semaya deka meri kontrek ba semua pengawa ke bekaul enggau dagang Petronas ti manggai RM2.1 biliun taun tu.
“Petronas angkun nentuka pengeraja asal tu ulih mai pemaik ngagai peranak nengeri tu.
“Nengah kerejasama rat entara Petronas enggau Perintah Nengeri Sarawak, kitai ulih ngangkatka tikas pengulih besemekih vendor(kontrektor) ari nengeri tu.
“Kitai mega deka ngemansang mudal mensia nengah program pelajar enggau latih teknikal kelimpah mantu pengerembai rama,”ku Tan Sri Sidek ba jaku pengelalu iya.
Dikena nentuka kontrektor Sarawak ulih ngerebut awak dagang , Sidek madahka Petronas bisi ngatur ‘Bengkel Perlesenan’ ungkup 450 buah kontrektor ti udah ngerijista diri enggau Unit Pengerejista Kontrektor sereta Konsultan (UPKJ) Sarawak.
Ba pengawa nya mega,13 buah kontrektor ti ngaul diri enggau Petronas Carigali Sdn Bhd, Malaysia LNG sereta Asean Bintulu Fertilizer (ABF) nerima gelar “Anugerah Kontraktor Cemerlang 2015’ .
Kontrektor ke nerima gelar iya nya Ropetech Sdn Bhd, Bintulu Port Sdn Bhd, Sribima (M) Shipping Sdn Bhd, Pacujaya Sdn Bhd, Lp Supplies & Services Sdn Bhd, Ultradex Engineering Supply Sdn Bhd, Trienekens (Sarawak) Sdn Bhd, Rahabco Engineering & Construction Sdn Bhd, Maysvitte Sdn Bhd, Jepak Holdings Sdn Bhd enggau Aspajati Sdn Bhd.
“Sehari tu ngepunka kerejasama entara Petronas enggau Perintah Sarawak ti keran nempa mayuh agi kontrektor nengeri tu ngaul diri dalam dagang minyak enggau gis.
“Dagang ti nyendiaka duit RM2.1 biliun tu sigi ungkup kontrektor ari Sarawak lalu sida patut nyikap diri enggau manah ngambika tan besemekih.
“Kitai deka meda kontrektor ari Sarawak bulih pemujur sereta nyapai sekeda gelar…ukai semina di Sarawak aja tang mega di Semenanjung Malaysia sereta dunya, “tandu Sidek.