Dikarang Jacqueline David //
KUCHING: Chairperson Serakup Indu Dayak Sarawak (SIDS) Dato Sri Empiang Jabu deka minta pemendar ari Gerempung Bansa Dayak Sarawak (SDNU) ngambika konstitusyen SIDS nya digaga sebaka enggau SDNU.
Ku Empiang, konstitusyen SIDS ke minta ditukar nengah SDNU nya, bekaul enggau pengawa bepilih komiti nya ngambika sebaka enggau SDNU, iya nya tiap tiga taun sekali, lalu maya Aum Besai Ninting Taun (AGM) tetap digaga setaun sekali tang nadai pengawa bepilih.
“Sekali tu, AGM Ke-18 SIDS nadai ngaga pengawa bepilih, laban kitai deka minta pemendar ari SDNU ngubah konstitusyen ngatur pengawa bepilih tiap tiga taun sekali.
“SDNU deka ngatur Aum Tiga Taun Sekali (TGM) sida iya kena 17 Mei tu ila, ke alai sebengkah ari agenda nya, SIDS minta SDNU ngubah konstitusyen nya,” ku Empiang.
Iya madah munyi nya lebuh bejaku bejadika Aum Besai Ninting Taun (AGM) Ke-18 Serakup Indu Dayak Sarawak (SIDS) Pampang Kuching di Hotel Penview ditu, kemari.
Empiang mega madah, iya berasai temegah ati beratika pemayuh kaban SIDS di serata menua Sarawak nyau mayuh udah nambah diatu ngelui 12,000 iku kaban ari 24 pampang SIDS di serata nengeri tu nyengkaum pampang Kuching bisi 2,180 iku.
Iya mega ngelalau kaban pampang di serata nengeri tu mayuh agi ngambi bala nembiak indu masuk serakup, ngambika ulih ngelatih sida iya nyadi ketuai nganti orang ke tuai diatu.
Kelimpah ari nya, iya ngelalau semua pampang diperansang ngaga aktiviti baka bejait, betenun, nusuk marik, ngaga pua tampung seribu, beranyam, ngaga perengka ias ari marik sereta kraf jari bukai, ngambika ulih dijual kena ngiga belanja unit diri.
“Enti tubuh kitai mayuh ngaga kraf jari, muntang endar alai kitai ngaga atur pengawa nyual kraf jari SIDS, tang laban tubuh kitai ke rinduka pengawa nya enda mayuh, pedis kitai ka muka atur pengawa nyual kraf jari SIDS.
“Nya alai, tiap pampang diperansang ngatur aktiviti ngaga kraf jari, ngambika enti mayuh kitai ke ngaga kraf jari, lantang endar kitai muka pasar kraf jari ba barang atur pengawa besai ke bisi di sitak kita tauka di nengeri tu,” ku iya.
Kelimpah ari pengawa kraf jari, iya mega madahka SIDS mega bisi nyendiaka insentif ke bala anak serakup ke mujur dalam pelajar, alai iya ngasuh kaban serakup ngisi pom ngambika anak sida ke nyulut bulih insentif.
Hari penudi nganjung nama anak sida kena 30 April tu lalu insentif nya deka diberi dalam bulan Julai 2015.
Empiang madah, laban iya seiku ari pemesai ke duduk dalam ‘Dayak Cultural Foundation’, insentif nya datai ari palan nya ke deka diberi ngagai nembiak tauka anak serakup ke mujur ngambika bisi nyaup anak sida nyambung pelajar ngagai palan pelajar tinggi.
Sebedau nya, chairperson SIDS pampang Kuching, ti mega chairperson pengatur pengawa AGM, Monica Sita Gaik ngelalau kaban serakup ke udah ngerijista diri nyadi kaban serakup, anang ngundur diri.
“Memula endang mayuh ka masuk serakup tang pengujung tinggal mimit. Pajakka pengawa ngereja mayuh agi aktiviti begulai enggau serakup, laban maya tu mih kitai tau belajar ari pangan diri, nyaup pangan diri.
“Nya alai, baka bayar masuk nyadi kaban serakup nya anang enda mayar, enda mar, semina RM3 aja setaun.
“Anang undur, sukung bala kitai indu kelebih agi bala kitai Dayak, laban ari kitai begulai enggau bala mayuh, kitai pan mayuh penemu ditemu kitai,” ku iya.
Bala ke enda dalam unit, ke datai ngerijista diri, ku iya ulih mayar nyadi kaban ba Tukang Wang Lanjing Renggie tauka Helena Ginjos ba Indu Opis SIDS di Kuching ditu.
Entara aktiviti besai bukai ke deka digaga SIDS pampang Kuching tu ila, iya nya aktivi ujung taun tu, iya nya ngaga Pre-Christmas (11 Dis) alai pengawa makai lemai deka diatur kena ngisi tabung serakup.
Ba atur pengawa nya, bisi 70 buah mija deka disediaka, alai kaban serakup dilalau nulung meli mija kelimpah ari begempuru bala mayuh.
Lalu, nangkan nya, deka ngaga aktiviti ba Rumah Orang Tuai, iya nya sebuah palan ‘Private Nursing Home’ sebedau Hari Gawai tu ila, lalu ditangkan enggau Hari Ruang Bilik
AGM SIDS nya kemari mega bela digulu 450 iku kaban SIDS nyengkaum unit pampang Kuching, sereta ari serata nengeri, nyengkaum tuai unit ke mai bala sida datai ngagai AGM nya.
Sama bisi ngulu atur pengawa nya, Sapit Chairperson SIDS Sarawak Datuk Catherine Gramong, Sekretari SIDS ti mega nyadi Penyanding Penemu SIDS Datin Seronita Linang enggau Sapit Chairperson SIDS Kuching Olivia Peter.