Nyau deka semua bansa di nengeri tu nemu bejaku Iban enggau chara ke betul, ku Jabu
MIRI: Jaku Iban nyau majak mayuh diguna ninting hari di nengeri tu lalu ngujungka jaku tu nyadi seiti medium ke pemadu beguna dikena nempa penyerakup pupu raban bansa ke nguan nengeri tu.
Sapit Kepala Menteri, Datuk Patinggi Tan Sri Alfred Jabu Numpang madah, nyau deka semua bansa di nengeri tu nemu bejaku Iban enggau chara ke betul.
“Jaku Iban diatu beguna amat nyadi medium penyerakup rayat pupu bansa. Kebuah pia, laban iya sebengkah jaku ke mayuh ditemu pupu bansa ukai semina di Sarawak tang mega di menua bukai.”
Jabu diarika Menteri Muda Pengintu Pengelantang Pendiau Sarawak, Robert Lawson Chuat madah munyi nya rambau Pengerami Makai Lemai Nangguhka Kus Nambahka Profesionalisme Pengajar (KPPG) Jaku Iban 2015 di sebengkah hotel, ditu kilah malam ensanus.
Jabu madah, nya alai perintah deka bebendar nyaga deka ngerembaika jaku Iban ngagai tikas ke lebih tinggi.
Dulu ari nya, Robert bisi nyebut jaku Iban endang kala nyadi jaku lingua franca jemah perintah Rajah Brooke.
“Maya nya kelia, endang udah bisi bup ditulis dalam jaku Iban lalu tu terang mandangka jaku Iban sigi mayuh guna. Nya alai, pengawa ngemansangka jaku Iban tu meseti terus dipajak,” ku iya.
Nangkan nya, kus nguna jaku Iban ba raban pengajar endang patut dipajak enggau chara nambahka pengelandik sida bejaku enggau ngajar dalam jaku Iban ke profesional.
“Kus tu ulih meri pangka ke besai ngagai bala pengajar kitai awakka jaku Iban majak ngerembai dalam mayuh bidang baka bidang pansik enggau bup chelak,” ku iya.
Nyerumba program nya, bisi 28 iku nyereta KPPG ke diatur di Palan Pematih Pengajar (IPG) Kampus Sarawak.
Robert ba pengerami nya bisi madahka diri deka meri RM10,000 dikena ngatur kus ke sebaka dudi hari.
Sama bisi datai Residen Miri Antonio Kahti Galis enggau Sapit Direktor IPG Kampus Sarawak, Gumbang Pura.