Dikarang Judan Bungap //
KANOWIT: Sekretari Politik Kepala Menteri Maurice Giri ngelalau bala tuai raban bansa ngambika semampai ngemaruka profil rumah panjai ke dipegai sida.
Ku iya, tiap bengkah penerang meseti digaga enggau betul sereta baru dikena ngelantangka agi ngatur pengawa bekaul enggau perintah.
“Profil rumah panjai meseti digaga enggau betul sereta semampai dikemaruka belama. Tu nyengkaum statistik rumah panjai, penyampau tubuh, tikas penatai pemisi, pelajar enggau pekara bukai.
“Enti tu enda dikemaruka belama, perintah pedis deka nemu nama pekara ke bisi nyadi.
“Kelimpah ari nya, semua bantu baka projek mega lantang agi deka diatur. Anang enda ngemeratka pekara tu,” pia ku iya maya bejadika pengerami nutup Woksop Profil Rumah Panjai ungkup Tuai Raban Bansa Pelilih Kanowit ba Opis Pelilih Kanowit ditu, empai lama tu tadi.
Pengerami nya bela digulu Pemesai Opis Pelilih Kanowit Katis Noel Nyabong, Pemancha Chi Chhau Fah, Pemanca Spencer Kudang enggau bala penghulu ke bukai.
Woksop nya diatur dikena nambahka penemu ngagai ketuai raban bansa senentang pengawa nyediaka profil ti lebih agi manah sereta nitih prosedur ti betul.
Ku Maurice, tuai raban bansa mega meseti bekerejasama enggau Tuai Rumah ngambika pengawa sida muntang agi dikereja.
Berebak enggau nya, iya madahka tuai raban bansa nyadika jematan perintah.
“Kitai nyadi ejen ti mai penerang ke betul ngagai perintah lalu nyaup ngerekaika pelin perintah ngagai rayat.
“Kitai enggai ninga bisi tuai raban bansa salah ngena penuduk lalu ngira penguntung ngagai diri empu aja,” ku iya nambahka baru.
Maurice mega minta semua tuai raban bansa enggau naka ulih bejalaika tanggungpengawa sida ba menua ke dipegai diri empu.
“Kelimpah ari nya kitai mega meseti bisi kaul ti manah enggau semua orang laban nya tau nyadika pelasar nentuka pengawa kitai ulih dikereja enggau muntang,” pia ku iya madahka baru.