PENEGAP KAUL: Wong (tengah) begulai enggau kaban parti UPP bukai ari Pampang Batu Lintang pengudah atur pengawa nya kemari.
Kelimpah ari pekara nya sida mega patut siru sereta mendingka pinta enggau peneka rayat
Dikarang Chris Bishop //
KUCHING: Presiden United People’s Party (UPP) Dato Sri Wong Soon Koh ngelalau kaban parti ngemeratka kaul dalam parti sereta kedut enggau rayat.
Ku iya, pengawa dalam parti enda ulih dikemujurka seiku aja tang kaban dalam parti patut begempung dalam semua pengawa ti dikereja.
“Enda ngira sekalika nuan nya kaban mit dalam parti tauka mangku pengawa besai, parti enda ulih bejalaika pengawa enti nadai sukung ari semua.
“Kitai patut meri servis ke pemadu manah ngagai rayat sereta seruran mendingka pinta sereta peneka rayat. Semina nengah chara nya aja parti tau bulih sukung sereta majak tegap,” ku iya.
Wong mansutka jaku tu rambau bejadika pampang UPP Batu Lintang besemak Jalai Tun Jugah ditu, kemari.
Ngenang kaul bukai, Wong madah, Kepala Menteri bisi nelai ngasuh UPP nyikap diri napi pengawa bepilih ke deka datai.
Nyaut tanya pemberita sekalika pemangku empat penuduk ADUN ari UPP bisi diasuh Kepala Menteri bediri ngenanka sitak diri ngarika Barisan Nasional (BN), Wong madah enggai nandu pekara ke udah ditemu semua.
“Aku enggai bejurai panjai sentang pekara tu ke alai aku mega enggai kelalu mejal Kepala Menteri,” ku iya.
Dulu ari nya, Chairman pampang ke mega Sekretari Besai UPP George Lo madah, Kepala Menteri bisi minta UPP nyabung chalun ke ulih menang ba pengawa bepilih ti deka datai.
Ketegal nya, Lo madah, UPP deka ngasika jaku kepala menteri nya taja pan iya enda netapka sitak ni UPP deka nyabung chalun.
“Semua nya dilempaika ngagai Kepala Menteri ke alai pengawa milih chalun ke ulih menang sigi berat ba runding parti.
“Parti deka mantaika chalun ke ulih menang lalu Kepala Menteri deka ngaga pemutus,” ku iya seraya madah, nya meh pesan ke pemadu berat ke bisi dianjung Kepala Menteri.