KUCHING: Opis Menteri Pengawa Berumah (MoH) udah ngenataika peminta merambu ngaga rumah penyampau 12,222 unit ke tau dibeli lalu 5,012 unit tau disuwa di baruh Program Perumahan Rakyat (PPR) ba Langgur Pemansang Malaysia Lumpar Kesebelas (RMK11).
Pekara nya diibantaika menteri iya Datuk Amar Abang Johari Tun Openg lebuh ti nyimpul jurai Opis Menteri Pengawa Berumah maya Aum Keterubah Penggal Kelima Kunsil Nengeri Sarawak Ketujuh Belas ditu, lemai kemari.
“Ba atur pengawa perintah nyendiaka lebih mayuh ‘rumah mampu milik (RMM) enggau rumah kos rendah(RKR)’ dikena napi peminta rayat ti majak nambah, opis menteri aku udah ngenataika peminta ngaga sepenyampau 12,222 unit rumah tau dibeli enggau 5,012 unit rumah disuw) di baruh PPR dalam RMK-11.
“Kitai arap bendar penyampau nya endang enda chukup, nya alai kitai deka nyendia tauka ngaga rumah nengah program bukai baka Program Rumah Mesra Rakyat, PR1MA, MyHome Scheme, Skim Perumhan Belia, Skim Perumahan Nelayan enggau Program Bantuan Rumah.
“Kelimpah ari nya kitai mega enda bepanggai ba perintah besai aja laban Perbadanan Pembangunan Perumahan Sarawak (HDC) udah merambu ngaga sepenyampau 3,508 unit rumah mampu milik dalam RMK-11 ba palan pengempu tanah nya empu,” ku iya.
Nambahka nya Abang Johari madahka opis menteri iya benung mansik baru Dasar Rumah Kos Rendah enggau Rumah Kos Serdehana Rendah ti udah dipejalaika 15 taun ke udah.
Iya madahka polisi ke diatu nya pemaju pengawa berumah peribit nyendiaka kuota ari 10 peratus ngagai 30 peratus bepanggai ba pemesai sesebuah projek pengawa berumah ti deka dipejalaika.
Rega rumah mega entara RM50,400 ngagai RM100,000 seunit ungkup raban bepenatai pemisi baruh ti teulihka penatai pemisi kasar ruang bilik kurang ari RM3,000 sebulan (rumah kos rendah) enggau RM5,000 sebulan (rumah kos sederhana rendah), ku iya.
“Laban polisi tu udah dikemeranka lebih ari 15 taun ke udah sereta bepelasarka pemansang sektor pengawa berumah diatu, kitai ngasaika polisi tu patut dipansik ngambika senipak enggau peminta guna rayat diatu.
“Nya alai diatu Opis Menteri aku benung dalam proses mansik baru polisi nya begulai enggau Opis Menteri Pengatur Pemansang Pengeraja Asal enggau Rampa Menua sereta ejensi bukai ti bekaul.
“Tu dikena ngenukuka polisi nya ulih dipejalaika enggau lebih efektif awakka ulih nyapai juluk nyendiaka rumah mampu milik ti bekualiti enggau lantang ke rayat.
“Berebak enggau tu opis menteri mega benung mansik opsyen levi pengawa berumah ungkup pemaju ti milih enda ngaga rumah kos rendah di baruh polisi nya,” ku iya.
Lebuh ti nyimpul jurai nya mega, Abang Johari madahka perintah bebendar mutarka penanggul setinggan di nengeri tu dikena nyapai juluk sifar setinggan manggai taun 2020 senipak enggau Pelan Tindakan Penyelesaian Setinggan Negeri.
Bepelasarka rikod taun 2010 serata nengeri Sarawak bisi 9,760 Ketua Isu Rumah (KIR) lalu kenyau Pelan Tindakan Penyelesaian Setinggan Negeri dipejalaika ba taun ke sama, sepenyampau 2,750 KIR tauka 28.2 peratus udah dikemendarka diputarka perintah nengah beberapa chara ti udah ditentuka, ku iya.
“Dikena ngenukuka juluk nadai ngampar diau di nengeri tu, perintah ngaga mayuh agi rumah mampu milik ba kandang endur ke mayuh ruang bilik setinggan baka di mengeri Kuching, Miri enggau Bintulu.
“Perintah nengah Opis Tanah enggau Survei mega deka ngelala mayuh agi orang ngampar diau ba sebarang endur patut diputarka nengah chara ‘in-situ’ tauka dipindahka ngagai skim pengentap baru ke udah bisi.
“Pengawa pematau enggau penerit adat ngagai kandang endur orang ti ngampar berumah deka chakah dipejalaika,” ku iya.