Penyakal minta dipeduaka BN meri agih MRP

0

Kelimpah ari pengari BN agih belanja nya patut mega dipedua enggau pengari rayat ari parti penyakal

KUCHING: Taja pan PKR Sarawak muji perintah nengeri ti udah ngagihka belanja RM500 miliun ungkup pemansang menua pesisir enggau transformasyen di menua tu, tang ku sida belanja nya patut mayuh agi diberi dikena ngerembaika pemansang di menua pesisir.

Chairman PKR Sarawak,Baru Bian muji perintah nengeri ketegal udah meri ungkup belanja, ngarapka pekara nya dibantai ukai ketegal pengawa bepilih ti deka diatur enda lama agi.

“Asai kami ungkup belanja nya patut dipedua sama rata ba semua sitak menua pesisir di serata nengeri tu, enda ngira sapa pengari politik sida,” ku Baru ke mega Kaban Kunsil Nengeri Ba’Kelalan madah ngagai The Borneo Post ensana.

Aum Kunsil Nengeri ti diatur kena 24 April, udah ngemendarka Bill Belanja Tambah (2015) RM780,252,456 dikena nambahka belanja nengeri ungkup taun tu, nyengkaum agih belanja RM500 miliun dikena ngemeratka transformasyen di menua pesisir sereta bejalaika mayuh bengkah pengawa rama tauka projek di menua pesisir.

Nengah awak nya mega, Baru madahka udah datai ba maya ke patut Sarawak nyelara diri ari atur Barisan Nasional (BN) ke diatu, ti nadai ngungkup agih belanja Projek Mit Pemansang Menua Pesisir (MRP) ngagai pengari rayat ari penyakal.

“Laban kitai bisi Kepala Menteri baru ti enda bechiping ati (Datuk Patinggi Tan Sri Adenan Satem), ti ngemeratka pengelurus sereta enda berat sepiak, ba runding aku, iya patut berani ngejangka diri ari atur ke ngelama tu sereta meri ungkup belanja nya ngagai semua.

” Baru bechuntoka PKR ti merintah nengeri Selangor, madahka perintah nengeri nya udah ngungkupka belanja MRP RM200,000 setaun ngagai penyakal, tang bantu nya enda diterima pengari rayat ari Barisan Nasional.

Mandal Chairman PKR ke mega Kaban Kunsil Nengeri Krian, Ali Biju madahka peranak menua pesisir ba sitak iya suah betanyaka ungkup belanja MRP ari perintah.

“Ba menua pesisir, sida sama bela mayar Chukai Servis enggau Barang (GST). Sida ngasaika diri patut diberi perintah ungkup belanja laban nya pan duit sida.”

Ali arapka Adenan nyadi Kepala Menteri ungkup semua sereta nyadi apai’ ungkup semua peranak menau Sarawak, lalu berunding meri MRP ngagai semua pengari rayat enda ngira penemu politik sida.

Ba sebengkah agi pekara, Ali arapka pengawa nyiri ‘tuai rumah’ enda dipolitik, seraya madahka bisi sekeda pengari rayat ti nguna tuai rumah mejal nembiak redak ke ari baruh pegai iya di rumah panjai, laban pekara nya enda setipak enggau gaya pengidup enggau adat komuniti Iban sereta ngelangkah atur Ordinan Ketuai Komuniti, 2004.

Baru, ke sama bela ngemeratka pekara nya pechaya, isu nya udah dikerembaika di serata menua Sarawak, lalu enti enda diketuka, nya deka ngemunaska adat enggau atur dalam komuniti.

“Nya alai kami endang bebendar minta perintah anang majak nguna kuasa politik ba pekara nyiri Tuai Rumah engagu Ketuai Komuniti.”

Berebak enggau nya, seiku agi Mandal Chairman PKR Nengeri, See Chee How madah sesapa tuai rumah ti ngasaika diri bisi kena tuntung pekara nya,PKR nadai nangi ngetanka ngarika sida dalam kot.

See, ke mega Kaban Kunsil Nengeri Batu Lintang madah, kelimpah ari kes seiku tuai rumah di Kanowit, bisi seiti agi kes ke pemadu baru difailka seiku agi tuai rumah, ke alai iya diketu nyadi tuai rumah taja pan mengkang regas bejalaika pengawa.

“Sebengkah pekara ti ditanya kami ba kes ti pemadu baru iya nya sekalika perintah bisi bejalaika pengawa nyiri tuai rumah. Tuai rumah patut dipilih peranak rumah panjai nya empu.”