Anang enda beserakup enti deka nyapai pemujur

0

Semua kaban SADIA dilalau ngemeratka penyerakup laban nya kunchi pemujur dalam pengidup

KUCHING: Beserimbai enggau pengerami Hari Gawai 2015, Gerempung Iban Dayak Sarawak (SADIA) pampang Kuching udah mujur ngatur pengawa makai lemai bepalan di sebengkah hotel ke tebilang kena 1 Mei tu tadi.

Presiden iya Dato Paduka Dr Anthony Nait Mani dalam jaku iya madahka, rambai jaku ke dikena iya nya “Beserakup Kunchi Pemansang” dipeda engkeman endar enggau kemaya hari tu sereta minta semua kaban SADIA enggau raban komuniti Iban dilalau ngambika terus beserakup enti sema sida deka nyapai pemujur.

“Semina nengah penyerakup aja kitai ulih mansang sereta tejapaika juluk dalam pengidup,” ku iya bejaku sebedau pengawa makai lemai berengkah.

“Kitai meseti ngembuan pengelurus ati dalam sebarang pengawa dikereja enggau nya kitai deka bulih pengarap ari raban ke bukai,” ku iya nandu.

Nait madah enti sema semua raban orang ngembuan semengat enggau ulah ti nyulut, sida deka bulih pemaik sereta pemujur ba pengawa pemansang di menua Sarawak tang kitai meseti nentuka menua tu tegap enggau likun.

Ku iya bejaku baru raban mensia mayuh enggai meda penyarut nyadi di menua tu, nya alai kitai meseti seruran nitihka atur sereta bekerejasama enggau raban penerit adat (polis), sereta nyadi mata enggau pending sida ngambika pekara ke tau ngeruga pengelikun di menua tu tau diseliah sereta dipunaska.

Nait mega ngelalau raban apai indai ngemeratka pekara pelajar ngambika anak sida bulih pemujur dalam pengidup dudi hari ila.

“Ketegal nadai ngembuan pelajar sekula ngujungka anak sida nadai ulih ngemansangka diri sereta jauh tinggal di belakang ba mayuh bengkah pekara sereta pedis deka maju.

“Pekara pelajar ulih ngubah pengidup kitai sereta nyungkak pemanah ba pekara ekonomi rama kitai,” ku iya nerang enggau silik.

Nait ngansak raban sida nyadika tulang belakang sereta nyaga ngemataka gerempung nya enggau tu deka ngayanka identiti raban bansa Iban, nengah gerempung tu mega kitai beserakup sereta mansang sereta nyerumba pemasang dunya kemaya hari.

“Pengawa makai lemai dipungkal enggau tanda asal bansa Iban ari raban SADIA Edward Ulok, seraya raban begualai enggau ruang bilik ke bukai sereta temuai ke bukai dinahka makai.

Raban orang ke ngulu pengawa makai lemai mega bisi diperindang enggau pengawa karaoke dipelanja ari raban gerempung dikena ngumpul belanja diungkupka pengawa bejalaika aktiviti dalam gerempung nya.

“Tuju pengawa lemai nya ngerami sereta meri basa ngagai presiden gerempung nya ke udah nerima gelar “Datuk Paduka” enggau ngintu hari pengada iya (2 Mei).

Dikena nyadika pengawa makai lemai pra-gawai tu nyadi pengingat lebuh maya Nait sereta raban ke bukai meri jaku basa ke tinggi ngagai Estelle Faith.

Iya tu seiku ari pengabang ke pemadu biak ke bisi datai ngulu pengawa makai malam SADIA Kuching berengkah ari iya dalam kandung indai iya, Veronica Aju, 40 taun.

Dikena meri basa ngagai penatai nembiak mit Estelle ke datai begulai enggau apai indai iya tu diberi perais ari Nait enggau raban ketuai SADIA Kuching.

Nait udahnya minta semua raban gerempung nya mai sereta raban nembiak ba ruang bilik sida nyereta mayuh bengkah pengawa ke bansa nya ngambika sida nemu adat asal sereta ngerijista anak sida berengkah ari umur setaun.