Pejalai kapal Logos Hope enda kala ngeruga pengarap orang ukai Keristin

0

BAU: Kapal besai ‘Logos Hope’ endang udah pegari rita nyadi sebuah kapal ke bejalai mai penemu ngagai serata dunya nengah bup ti dibai tauka dijual sida iya dalam kapal nya, ku Menteri Muda Pemansang Pupu Raban Bansa Datuk Peter Nansian Ngusie.

Penemu ke ngumbai kapal ‘Logos Hope’ nya kapal ke ngerembaika pengarap Keristin seiti penemu ke enda betul, taja pan dalam ‘Logos Hope’ bisi nyual bup ke bekait enggau pengarap Keristin tang pejalai sida enda kala ngeruga pengarap orang ukai Keristin.

Nansian madah pengawa ‘Logos Hope’ sigi nyadung penemu serayaka belayar ngagai serata dunya.

“Pengarap tu pilih kitai empu, enda ngira nama pengarap nuan, enti nuan orang ke tegap dalam pengarap diri empu, nuan arap ke pengarap diri empu…Aku enda ngira ni bagi pengarap ke dipegai seiku-seiku, tang ba aku semua kitai tu, baik nya Islam, Keristin, Buddhists, kitai arapka seiti endur, iya nya Serega.

“Baka ni chara kitai nuju endur nya, barang ku kitai. Sekeda nya nyangka ngena chara tu, sekeda nya mayuh chara.

“Tauka kitai milih deka bedarat, ngena ensikal kini, kerita bansa Toyota kini. Tauka Mercedez kini. Aku nemu nadai jalai madahka Mercedez nuan nya enda manah tauka Toyota aku nya manah agi kini, laban barang utai ke dikena kitai, tuju nya sama, asal datai ba endur ke sama,” ku iya.

Nansian madah munyi nya lebuh ningkah penemu sebengkah NGO, iya nya Ikatan Muslimin Malaysia  (ISMA) ke madahka kapal besai ‘Logos Hope’ ke mai sereta nyual bup belayar ngagai serata dunya, seiti chara orang ke bejalaika kapal nya ngerembaika pengarap Keristin enggau chara alus tauka enda dipeda.

Pengudah sangkai di Kuching, kapal besai nya lalu belayar ngagai Pulau Pinang, alai ISMA dipadah bisi bejaku munyi nya, laban kapal nya ke belayar nuju semenanjung.

“Enti nuan tegap dalam pengarap nuan empu, nama kebuah irau orang ngasuh nuan masuk pengarap sida iya?,” ku tanya Nansian.

Nansian ti mega nyadi ADUN Tasik Biru, Bau madah munyi nya lebuh dikerandau pengudah bejadika atur pengawa Nyuaka Geran Perintah ngagai urung 25 buah pengari gerija di sitak nya, kelimpah ari udah meri pan ngagai surau sereta masjid enggau tepikong China (8 Mei tu ila).

Nya alai ku iya, tegapka pengarap diri empu, lalu enda ibuh irauka pengarap orang bukai.

“Ngelama tu pan kitai diau enggau likun di Sarawak…Kitai nadai kala bisi penanggul enggau kaban belayan tauka bakih kitai ke bepengarap lain ari kitai. Sida ke Islam nyaga pengarap sida iya empu, lalu baka nya mega enggau pupu bansa China nyaga pengarap sida iya, kitai ke Keristin nyaga pengarap kitai.

“Nama kebuah takutka pengarap orang bukai, enti pengarap nuan tegap, pajakka penegap nya, jaga pengarap diri empu sereta bebasaka pengarap, lalu anang ngachau pengarap orang bukai.

“Pengarap nya pilih kitai empu, nuan ka masuk pengarap bukai, nadai orang nagang tauka meransang,” ku iya.

Bedau lama tu tadi, ‘Logos Hope’ bisi sangkai di Pengkalan Sim Kheng Hong ditu belabuh ari 1 nyentuk 29 April 2015.

“Logos Hope dibuka ngagai mensia mayuh kena 2-29 April 2015. Dalam kapal tu bisi 400 iku pengereja pengawa ke datai ari 58 bengkah menua.

Kelimpah ngatur program dalam kapal, sida mega deka bejalaika program komuniti di nengeri tu dikena mantu raban orang ke timpang pendiau baka anak patu balu enggau orang tuai.

Tiket masuk kapal tu, ku iya dijual RM1 ungkup orang tuai, nembiak biak 12 taun masuk pechuma tang meseti disempulang orang tuai.