Dikarang Chris Bishop //
KUCHING: Program Go Bald Kuching sekali agi diatur dikena ngumpul belanja ungkup pengawa ngintu raban nembiak ke betapi enggau sakit riman di nengeri tu.
Diatur Serakup Sakit Riman Nembiak Nengeri Sarawak (SCCS) program ke masuk taun ke-7 diadu ba 2015 tu nagit ulih ngempuru belanja sepenyampau RM1.5 juta.
Program ke berengkah pukul 10 pagi di palan bebeli barang CityOne Megamall bela nerima sukung ari Menteri Kereja Raya Dato Sri Fadillah Yusuf ke alai iya mega udah meri belanja penyampau RM10,000 ngagai SCCS.
Ba pengawa nya mega Fadillah mujur nyaup SCCS ngumpul RM100,000 agi dikena nambahka pemeri ari orang bukai.
Dulu agi ari nya, Presiden SCCS Rodney Wong madah SCCS begunaka belanja urung RM1.5 juta ba taun 2015 lalu deka dikena melanja semua pengawa merubat nembiak ke sakit riman.
“Belanja penyampau nya deka dikena SCCS numbuhka seiti palan ngenduh sementara nembiak sakit riman di Miri, melanja ungkus berubat sereta dikena nyendiaka perengka berubat,” ku iya.
Program Go Bald keterubah dipejalaika ba taun 2009 lalu kenyau nya udah nerima sukung ke manah ari mensia mayuh di nengeri tu.
Kelimpah di Kuching sehari tu (Kemari), Program Go Bald mega deka diadu di Delta Mall Miri kenaka 10 Mei, Permaisuri Imperial City Mall, Miri (17 Mei) enggau Parkcity Everly Hotel, Bintulu (24 Mei).