Pengawa tu ngelanggar undang-undang perintah nengeri lalu ulih kena ukum enti ditemu ngereja penyalah nya
SRI AMAN: Tuai rumah di menua pesisir dilalau anang ngaul diri enggau sebarang aktiviti nebang kayu nadai belisin ba kandang tanah Hak Adat Bumiputera (NCR) diri empu.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, kebuah pia sebarang pengawa betebangka kayu nadai belisin endang ngelanggar undang-undang perintah nengeri lalu ulih kena ukum enti ditemu ngereja penyalah nya.
“Nya alai, anang sesekali nguji ngaul diri enggau sebarang piak ke nyual kayu ba tanah NCR kita,” ku iya.
Kenu ku Harden, pengawa nyual kayu ari tanah NCR nya ulah ke ngerugi diri empu, laban enti berunding panjai pengawa nyual kayu nitihka chara ke betul ulih meri penguntung ke besai.
Harden ke mega Kaban Kunsil Nengeri (ADUN) Simanggang madah munyi nya rambau bejadi Program MEMBARA ‘Semarak Kejiranan’ bepalan di Rumah Darwin, San Demam, Sri Aman, ditu, kemari.
Harden mega bisi madahka diri ngungkupka RM5,000 ngagai JKKK Rumah Darwin enggau RM3,000 ngagai Komiti Indu sida.
Nangkan nya, Kaban Parlimen Sri Aman, Masir Kujat nengah pengari iya Edmund mega ngungkupka belanja RM3,000 ngagai gerempung indu rumah panjai nya.
Berebak enggau nya, Harden ngelalau peranak rumah panjai dulu berandau enggau pangan diri nyema tanah NCR sida deka dikemansangka enggau projek betupi dandang besai ari perintah.
“Anang ngelakka tanah NCR nadai ngemansutka asil. Perundingka chara dikenansang ngemansangka tanah pesaka nya ngambika iya ulih ngemansutka asil jemah ila,” ku iya.
Sama bisi datai Pemesai JASA Sri Aman, Whelton Lumpoi, Ketuai Opis Kaunsil Pelilih Menua Sri Aman, Richard Tawan Sedu, Pemesai JTS Sri Aman, Dorris Synia, Peribit Sekretari Kaban Parlimen Sri Aman, Edmund Pirang, Penyanding Penemu Komiti SUPP Simanggang, Patrick Michael Malajin enggau bala tuai rumah ke semak.