PM netapka diri datai ngulu pengawa Mantar Gawai kena 16 Mei, TGM SDNU diatur 17 Mei
Dikarang Jacqueline David //
KUCHING: Serakup Bansa Dayak Sarawak (SDNU) deka bejuraika ubah dalam konstitusyen serakup nya ke mungkur serakup tauka gerempung Dayak ke bukai maya Aum Besai Tiga Taun Sekali (TGM) kena 17 Mei tu.
Ketuai Publisiti SDNU Ganchai Jinta lebuh dirandau pasal pekara tu madah, TGM ti deka diatur nya ila, bekaul enggau konstitusyen SDNU ti udah diatu maya TGM sebedau tu, iya nya konstitusyen bekaul enggau pengawa ngerijista nyadi kaban serakup.
“Suba, tiap taun kaban serakup patut mayar RM6.00 tang maya TGM tu ila atur nya deka diubah ngambika tiap kaban serakup semina mayar sekali lalu tau nyadi kaban seumur idup,” ku Ganchai
“Nyadi diatu, SDNU benung ngiga jalai ni bagi konstitusyen ke patut diubah, awakka ngenyamaika semua atur pengawa administratif SDNU,” ku Ganchai.
Sebengkah agi pekara ke deka diubah ku iya, pampang tauka unit SDNU ke bepilih 2 taun sekali mega deka diubah ngagai tiga taun sekali awakka sebaka enggau pengawa bepilih ba Indu Opis SDNU nya empu.
Kelimpah ari nya, utai bukai dalam konstitusyen naka ke diatu udah diperatika deka diubah,baka ngemasukka pangku pengawa baru Mandal Presiden Kanan ngambika tau ngarika sekeda NGO ba pampang tauka sitak menua tengah baka Sibu, utara tauka ba sitak bukai.
“Nya dua bengkah konstitusyen ti deka diubah awakka SDNU ulih diarika enda kurang 4 tauka 5 iku Mandan Kanan Presiden. Pangku pengawa Mandal Presiden (VP) agi sebaka baka selama ke alai VP1 dipilih, VPII (mangku pengawa nyadi chairperson SIDS enggau VPIII mangku pengawa nyadi Ketuai Nembiak,” ku iya lalu nambah, naka ke diatu, undang-undang SDNU ka diubah ba TGM tu ila.
Maya TGM tu ila, semua pampang datai nganjung penyereta, sereta pemerati. Pampang tau nganjung enda kurang ari 6 tauka 7 iku penyereta (bisi sekat pemayuh), nitihka pemayuh kaban dalam pampang nya, tang pemerati nadai sekat.
Nimbal penemu Chairperson Serakup Indu Dayak Sarawak (SIDS) Dato Sri Empiang Jabu maya AGM serakup nya dua minggu ke udah, ke minta TGM SDNU tu ila ngubah konstitusyen SIDS nitihka konstitusyen SDNU, ku Ganchai:
“Pekara ti dipinta Chairperson SIDS Dato Sri Empiang Jabu endang deka dipejuraika sereta udah dalam perambu ubah undang-undang nya,” tandu iya.
Sebedau TGM SDNU nya, Ganchai ti ngarika Chairman Pengatur pengawa makai lemai Mantar Gawai SDNU Datuk Alexander Nanta Linggi ti mega Sapit Menteri Pemansang Menua Pesisir enggau Kandang Menua madah, pengawa nya deka dipenyadika Menteri Besai (PM) Datuk Seri Mohd Najib Tun Razak kena malam Hari Enam, 16 Mei tu di Palan Aum Besai Borneo Kuching (BCCK).
Naka ke diatu ku iya, Presiden SDNU Tan Sri William Mawan endang udah berandau enggau PM, lalu Najib empu udah nyanggup diri datai enti nadai sebarang penanggul ngenyit, lalu sida unit korporat tauka protokol Opis Kepala Menteri mega udah dipadah.
“PM udah madahka diri ulih datai enti nadai sebarang penanggul bukai, lalu opis Kepala Menteri mega udah dipadah,” ku iya.
Pemayuh mija pengawa makai lemai nya ila bisi dalam 200 buah lalu naka ke diatu, mija ke udah dijual dalam bisi 130. Rega semija RM900.
Mensia mayuh ke deka meli mija, tau betelefon ngagai Indu Opis SDNU betanya ari Diana Lang nengah lumur 082-570433.
Maya malam nya mega, disadang enda kurang ari 30 iku kaban Dewan Adat Dayak (DAD) ari Kalimantan Barat (KALBAR) deka ngulu atur pengawa nya ke diuluka Presiden DAD KALBAR empu enggau Sapit Presiden Majlis Adat Dayak Nasional (MADN) ari Pontianak.
Raban ari KALBAR tu deka datai di Kuching kena 15 Mei lalu sida iya deka dijamu SDNU makai lemai sebedau sama begulai ngabang ba pengawa Mantar Gawai SDNU hari seiti nya.