Dikarang Judan Bungap //
KE PENGINGAT: Tengku nyuaka tepa ngagai Nanta (lima kiba) kelai basa bejadika pengerami nya.
SIBU: Raban bansa Dayak patut berasai temegah enggau penumbuh Gerempung Bansa Dayak Sarawak (SDNU) lalu bela ngetanka penegap gerempung nya.
Sapit Presiden SDNU Datuk Alexander Nanta Linggi madah, gerempung tu ditumbuh ari taun 1956 ti ngembuan tuju deka ngempung sereta ngintu semua raban bansa Dayak.
“Nya alai, aku minta semua raban gerempung baik nya ba pati tauka pampang enggau indu opis bela chakah ngemujurka tuju gerempung kitai.
“Ba penemu aku, bansa Dayak patut begempung ngetanka gerempung tu lebih agi ba pekara bekaul enggau penyerakup bansa kitai,” ku iya.
Iya mantaka jaku tu maya pengerami makai lemai beserimbai enggau Pekit Badminton Tertutup Dayak 2015 ditu, empai lama ke udah.
Iya ti mega Sapit Menteri Pemansang Menua Pesisir enggau Kandang Menua madah, ba gerempung nya bala raban enda ulih ngira diri aja tang sama bela megai tanggungpengawa ungkup gerempung.
“Ari nya, kitai ngena sistem demokrasi alai ngatur pengawa bepilih dikena nentuka sapa megai seiti-seiti penuduk.
“Taja pia, sida ke enda dipilih mega meseti mantaika sukung sida ngagai gerempung,” ku iya ti mega Kaban Parlimen Kapit.
Nanta mega ngelalau bala raban ngambi enda ngibuhka jaku ti enda manah laban nya tau ngereuga pengelikun gerempung sida.
Ku iya, presiden gerempung Tan Sri William Mawan Ikom enggau komiti ke bukai udah bebendar ngetan sereta ngeringka SDNU.
“Ketegal tu mega, bala komiti enggau Mawan besetuju deka nambahka mayuh agi penuduk mandal presiden maya Aum Tiga Taun Sekali (TGA) ti deka datai ngambika kitai ulih nambahka agi penyampau raban,” pia ku iya madahka baru.
Nanta maya tu mega bisi madah, sida deka nyediaka penuduk ke diungkup ngagai raban nembiak ti ngembuan penemu ke manah agi.
Iya madah, enti penemu raban nembiak berakup enggau penemu raban ke udah lama ti ngembuan mayuh peneleba tau ngeringka agi gerempung sida.
Berebak enggau tu, Nanta madahka perintah besai enggau nengeri semampai deka mendingka penemu rayat.
Ku iya, baka Kepala Menteri Datuk Patinggi Tan Sri Adenan Satem endang kemerah enggau rayat sereta mendingka semua penemu orang.
Pia mega iya madah, baka Menteri Besai Datuk Seri Najib Tun Razak udah meri RM2 jura ngagai SDNU dikena bejalaika program.
Ba pengerami tu mega, Chairman SDNU Pampang Sibu Tengku Gruna madahka pekit ke diatur nya engkeman bendar dikena nempa kaul bala raban bansa Dayak.
Iya mega mada, Mawan bisi ngagihka geran projek mit menua pesisir (MRP) RM20,000 ngagai SDNU Sibu dikena bejalaika program.