KUCHING: Dunya ke majak moden nyengkaum pemansang teknologi penyambung diatu udah ngujungka amang siber kitai sama mansang nyerumba pemansang dunya.
Kepala Menteri Datuk Patinggi Tan Sri Adenan Satem madah, berindik ari nya komitmen kitai ti ngena perengkaguna ICT ke pemansang ekonomi-pengawa rama, begunaka kitai nyaga infrastruktur pemadah kritikal enggau jampat, ngambika ulih ditagang.
“Reti nya, perintah di serata dunya nyengkaum Malaysia patut berakup nyaga infrastruktur nya ari amang siber,” ku iya.
Adenan madah munyi tu nengah teks jaku iya ti dibacha Menteri Pengawa Berumah, Datuk Amar Abang Johari Tun Openg lebuh bejadika ‘International Organization for Standardization/International Electrotechnical Commission Joint technical Committee 1/Subcommittee 27 (ISO/IEC JTC 1/SC 27) Information Technology Security Techniques Meeting’ di Palan Konvensyen Borneo ditu, kemari.
Ku iya, trend amang siber ti mudah ngelekai sereta majak nambah diatu ngirauka ati.
Bekaul enggau pekara tu ku iya, Malaysia nengah CyberSecurity Malaysia (CSM), sebuah ejensi ari baruh Opis Menteri Sains, Teknologi enggai Innovasi Malaysia (KSTI) sereta ‘National Security Council’ (NSC) benung mansik baru sereta ngemesaika agi bungkur ‘National Cyber Security Policy’, ti nyadi sebagi ari perambu negapka pengelikun internet di menua tu.
“Ba taun ti deka datai tu ila, kitai deka negapka pengetan menua tu ari kena serang siber nyengkaum ngulihka pemadah nengah ‘online’ enggau chara ke likun baka e-forensics, sistem integriti, negapka pemereti ati entara orang ti ngena enggau orang ke nyendia, sereta ngaga sistem pemisi ke tinggi sereta kreatif,” ku iya.
Iya nandu baru, perintah deka majak bejalaika pansik pengelikun siber nuju ngemansangka hab e-dagang sereta nyadi ekonomi digital bepelasarka ICT.
Dulu ari nya, Menteri KSTI Datuk Sr Ewon Ebin madahka Malaysia udah lama nyadi penyereta ke regas ba pengawa pemansang setindit entarabansa ke alai Malaysia nyadi kaban SC 27.
“Sekeda ari pengawa sereta kelala (ambika chunto), iya nya ‘Lead Editor for ISO IEC 27037 Guidelines for the Identification, collection, Acquisition and Preservation of Digital Evidence’ ti dichelak dalam taun 2012.
“Diatu, pan kami benung nyalin versyen ke pemadu baru, ISO IEC 27001 ‘Information Security Management Systems – Requirements’ sereta ISO IEC 27002 ‘Code of Practice for Information Security Controls’ disalin ngagai Jaku Bahasa Malaysia.
“Tu dikearapka ulih ngeyampatka agi chara ngena ISMS ba industri Malaysia ke lebih agi dalam ‘Critical Network Information Infrastructure’ (CNII),” ku iya.
Ba aum sehari nya kemari, urung 200 penyereta ari 30 buah menua di serata dunya bisi sama enggau ngulu aum nya, kelimpah ari bekunsika peneleba sereta pekara bekaul enggau amang siber ke seruran nyadi, baik nya ba perintah tauka orang sesiku.
Sama bisi ngulu atur pengawa nya kemari, Kepala Direktor, Opis Setindit Malaysia Datuk Fadilah Baharin, Sekretari Pampang Industri ari Opis Menteri Sains, Teknologi enggau Inovasi, Dr. Mokhtar Tahar enggau Ketuai Pegawai, Sektor Pemerkasaan Digital MCMC Toh Swee Hoe.