Dikarang Chris Bishop //
PENGERANDANG PENELEBA: Deliget ari Malaysia begulai enggau Prof Dr Neilson (kiba) enggau Tan Sri Rastam (empat kiba).
KUCHING: Sebengkah ari chara dikena ngedut kaul entara sesebengkah menua ke dikumbai ‘Track II Diplomacy’ ke alai gerempung tauka raban ukai dikuasa perintah ngerapitka kaul entara mensia ba kededua menua nya.
Kaul tu dikumbai ‘people to people relations’. Kaul ti baka tu ukai semina ulih ngenegapka ekonomi enggau sosial entara kededua menua tang mega ulih nyukung ngenegapka kaul politik.
Kuasa besai di rantau Asia baka menua India enggau China endang disadang ulih mekit menua kuasa besai di dunya tu baka Amerika sereta sekeda menua di Europah.
Menua China mega ngarapka diri ulih nyadi kuasa besai di Asia ti disukung menua di Asia lebih agi gerempung ASEAN.
Penyampau dagang menua China enggau sekeda menua ASEAN endang besai lalu berindik ari nya sida enda tau enda ngemeranka kaul ti rat sereta manah enggau menua bukai.
Di Malaysia, ‘Institute of Strategic and International Studies’ (ISIS) endang sebengkah gerempung ti ngemeranka Track II Diplomacy enggau gerempung ti ukai dikuasa perintah di menua China.
Sekeda ari gerempung tauka ‘Think Tank’ menua China ti bisi kaul enggau ISIS iya nya, ‘Chinese People’s Institute of Foreign Affairs’ (CPIFA), ‘Security Cooperation in the Asia Pacific’ (CSCAP) enggau ‘China Institute of International Studies’ (CIIS).
“Randau nengah ‘Track II Diplomacy’ tu tau nenak agi laban mayuh pekara ti enda ulih disebut bala tuai dua bengkah menua ulih dikerandauka enggau nadai penanggul,” ku Neilson Ilan ti bisi nyadi kaban ‘Malaysia Track II Delegation’ ke Beijing enggau Fujian ba tengan bulan April tu tadi.
Associate Professor Dr Neilson Ilan Mersat seiku intelektual kitai Iban ke nyadi Dekan Fakulti Sains Sosial UNIMAS sereta ngembuan PhD dalam ‘Political Science enggau International Relations’ ari The Australian National University.
Track II Delegation Malaysia betubuh sepuluh iku ti betuaika Chairman ISIS, Tan Sri Rastam Mohd Isa.
Neilson maya dirandau bedau lama tu tadi nambah, ambika banding isu baka sekeda ari pulau di South China Sea ti diperebutka menua China enggau menua ASEAN baka Vietnam, Filipina, Malaysia enggau Brunei mega ulih dikerandauka enggau dalam agi.
“Menua China endang enda ngelengkaka ambu ba sekeda pulau nya tang baka diatu menua China ngasaika sida bulih mayuh agi penguntung ekonomi enti menua nya ngatur kaul ti manah enggau menua di Asia lalu nyeliahka jalai ti agresif lebuh nguji mutarka penanggul senentang penyarut pulau.
“China ngembuan ekonomi ti maju sereta besai lalu tambah mega penyampau tubuh sida amat mayuh,” ku iya.
Berindik ari nya ku Neilson, sida begunaka peluang endur rayat iya ngiga pengawa sereta bekereja di menua luar lalu pia mega begunaka makit endur ngelakuka barang ti dikeluarka menua China.
Dikena sida ngerembaika penatai pemisi, menua China nengah rambai leka jaku ‘21st Century Maritime Silk Road’, tandu Neilson.
Iya mega madah tu endang sebaka enggau jalai dagang pelayar enggau pedagang China beratus taun menya iya nya belabuh ari menua Fujian nyentuk ke menua Afrika.
Diatu di menua Fujian bisi penyangkai kapal ti besai di pulau Xiamen, dikena sida mandangka pemendar deka ngemansangka menua di Asia dia alai menua China ngepunka sebuah bank besai ti dikumbai Asian Infrastructure Investment Bank (AIIB) lalu naka diatu bulih sukung ari mayuh menua bukai nyengkaum menua Malaysia.
Bank ti bepukuka USD50 billion tu dikena ngemansangka infrastruktur di menua Asia.
Ngenang sentang kaul enggau menua ASEAN, Neilson madah, menua China besai pengarap ke menua Malaysia laban ti ngembuan kaul ti chukup manah enggau menua Malaysia jam ke diatu.
Penemuai ‘Track II Delegation’ ari Malaysia endang dikena ngenegapka kaul rayat entara kededua menua tu.
“Taja pia menua China enda ulih nyeliahka diri ari tuduh kuasa besai bukai ti madahka menua nya sirung penemu sereta bisi ati deka bekuasa di rantau Asia tu.
“Nitih tuduh tu semua pengawa ti dikereja menua tu di Asia endang dikena ngerandang jalai ngambika bekuasa di genturung di rantau Asia,” ku Neilson.
Penemu orang luar ti baka tu endang ditemu bala pemesai ari Chinese People’s Institute of Foreign Affairs (CPIFA). Sida mega nguji meri penerang ngagai rayat menua bukai ngena jalai Track II Diplomacy, tandu iya.
“Penemuai ‘Track II Diplomacy’ ari Malaysia ngagai menua China udah mujur meri peluang endur bejuraika mayuh macham pekara sereta ngenegapka kaul entara kededua menua tu.
Malaysia arapka bulih penguntung ti beasi ari perambu ‘21st Century Maritime Silk Road’ ti ditengkebang menua China,” ku Neilson.