KUCHING: Surat penerang pejurai ari Komiti Teknikal Bansa Bumiputera (Minoriti) sentang nguna leka jaku ‘Dayak’ nyilih ‘Lain-Lain’ ba pom perintah bedau tembu diserenih.
Menteri ba Opis Menteri Besai Datuk Joseph Entulu madah, surat penerang sentang pekara nya semina deka dianjung ngagai Kabinet Perintah Besai pengudah nyengala tembu.
“Pengudah baum kena 5 Mac tu tadi, sekretariat ke nyadi Implementation Coordination Unit (ICU) bedau nyendia surat penerang nya ngambika ulih dikemendar kabinet.
“Tu ketegal sekeda pekara ke bekaul di Nengeri Sabah bedau diputuska. Kami Komiti Teknikal Bansa Bumiputera (Minoriti) deka sekali agi baum kena 12 Mei tu.
“Aku pechaya pekara tu deka dikerandau lalu semina pengudah nya, surat penerang tu deka dianjung ngagai kabinet,”ku iya ke mega Kaban Parlimen Selangau madah ngagai The Borneo Post Hari Empat tu tadi.
Iya nambah, aum nya ila deka bechairmanka Menteri Kuasa, Teknologi Gadung enggau Ai Datuk Seri Dr Maximus Ongkili sereta Menteri Kebun Bedandang Besai enggau Komoditi, Datuk Seri Douglas Uggah.
Entulu ke mega Sapit Presiden Parti Rakyat Sarawak (PRS) madah surat penerang pejurai ti ngenukuka nguna leka jaku ‘Dayak’ nyilih ‘Lain-Lain’ ba pom Perintah Sarawak enggau Sabah deka diputuska ba aum (BTC) nya.
Entulu udah merambu nguna leka jaku ‘Dayak’ ngagai Komiti Teknikal Bansa Bumiputera (Minoriti) nyilih ‘Lain-Lain.
Iya madah, pemutus nya bepelasarka pinta enggau peneka asil ari randau begulai enggau raban profesenyal Dayak sereta gerempung Dayak ke ukai dikuasa perintah (NGO) ti udah diatur di Sibu, Miri enggau Kuching.
Rambau interviu ti dipandang ba TV1 bedau lama tu tadi, Kepala Menteri Datuk Patinggi Tan Sri Adenan Satem madahka diri nadai penanggul nerima pemutus tauka peneka ari raban bansa Dayak ti deka nguna leka jaku ‘Dayak’.