PENETAP NGO DAYAK: Mengga (duduk tengah) nyain Penetap ke udah dipesetujuka semua ke bisi ngulu forum nya. Bela bisi ngemata, presiden SADIA, Sidi (dua kiba) enggau presiden SDGA, Dusit (dua kanan), Paul (duduk kanan) sereta raban kaban komiti bukai.
Ukai semina dikeringka NGO Dayak, semua MP enggau ADUN bansa Dayak patut nyukung magang
Dikarang Chris Bishop //
KUCHING: Presiden Serakup Dayak Iban Sarawak (SADIA) Sidi Munan meri penetap ti nyemetak minta semua gerempung ke ukai dikuasa perintah (NGO) Dayak, ngansak perintah Sarawak bebasa sereta ngaku ‘Pemakai Menua enggau Pulau Galau’ ke udah diperimba endur begigaka pemakai enggau pengidup raban bansa asal menua tu dulu menya ditetapka di baruh Adat Tanah Bansa Asal (NCR) nengeri tu.
Bejaku lebuh nangguh Forum Tanah Adat Bansa Asal (NCR) ke diatur Dayak National Congress (DNC) begulai enggau SADIA sereta Sarawak Dayak Graduate Association (SDGA) Hari Enam tu tadi, Sidi nangkan, semua NGO Dayak enda patut mantul nyentukka pinta ba pekara nya diterima perintan nengeri tu.
“Kitai endang deka minta belama nyentukka Perintah Nengeri bebasa, ngelala sereta ngaku ‘Pemakai Menua enggau Pulau Galau’ reti ba Iban endang ngembuan ‘abi kaki jari’ dulu menya baka ke udah ditetap ba tanah temuda.
“Pinta kitai tu mega nadai ” “ ujung nyentukka perintah nengeri tu bebasa ba Adat enggau Main Asal bansa Dayak sereta ‘land tenure system of the natives landowners concerned’,” ku iya bejaku b mua lebih 250 iku penyereta forum ke datai ari serata nengeri.
Sidi mega minta perintah nengeri bebasaka reti ‘tanah temuda, pemakai menua enggau pulau galau’ ba Adat Tanah Bansa Asal lalu enda ngapil pengudah pemutus kot ba pekara nya baka kes TR Sandah Tabau di Kanowit.
Rambau forum nya semua ketuai NGO ke bisi ngulu atur pengawa nya sereta mensia mayuh setujuka empat Penetap iya nya: Kesatu; deka masuk champur ba Kot Perintah Besai (Malaysia), ngenggaika pemutus Perintah Sarawak ti minta Kot Perintah Besai ngemunas reti ‘Pemakai Menoa enggau Pulau Galau’ ari dipasuk atur dalam Adat Tanah Bansa Asal (NCR) ba Kod Tanah Nengeri Sarawak.
Kedua; forum minta Perintah Nengeri Sarawak mereti sereta bebasaka Adat Iban sentang ‘Pemakai menua enggau Pulau Galau’ sereta pekara bukai ke bekaul enggau main asal komuniti Dayak di Sarawak.
Ketiga; minta semua menteri bansa Dayak nyengkaum kaban parlimen (MP), kaban kunsil nengeri (ADUN) meri sukung, mereti sereta bebasaka Adat Tanah Bansa Asal ke mungkur ‘Pemakai Menua enggau Pulau Galau’ sereta adat enggau main asal bansa Dayak ke bukai.
Keempat; sebengkah komiti deka ditumbuh ngambi bejalaika pengawa sereta ngemujurka Penetap Keterubah.
Berebak enggau nya Sidi, Presiden Sarawak Dayak Graduet Association (SDGA) Dr Dusit Jaul enggau Presiden DNC Mengga Mikui bela nyain Penetap ke udah dipesetujuka semua mensia ba forum nya.
Empat Penetap nya dipesetujuka lebih 250 iku penyereta forum ti datai nengah ‘referendum’ ke diatur di Balai Mensia Mayuh DBNA Jalai Kumpang ditu.
Nguluka pengawa ‘referendum’ Co-Founder ke mega Mandal Presiden DNC Paul Raja ngansak semua menteri bansa Dayak nyengkaum MP enggau ADUN nengeri tu meri sukung ba Penetap Forum nya.
Entara NGO Dayak ke bisi ngulu atur pengawa nya, Gerempung Adat Asal Bidayuh Sarawak, YATT Society (You Are Totally Trusted), SADIA, PEDAS, Gerempung Bansa Kristian Jaku Iban Malaysia (GBKJIM), DBNA, DNC sereta mensia mayuh.