Kepala Menteri patut mandangka pengeran bejalaika atur perintah ti lurus, tebuka sereta enda bechiping
Dikarang Chris Bishop //
KUCHING: Kepala Menteri Datuk Patinggi Tan Sri Adenan Satem dipinta neritka undang-undang ba seiku menteri muda ti benung ditasat Komiti Penagang Pengawa Makai Suap Malaysia (SPRM) bekaul enggau salah guna kuasa sentang projek Baitul Makmur II ke beungkus RM250 juta.
Mandal Presiden Parti Keadilan Rakyat (PKR) Sarawak See Chee How madah, kepala menteri patut ngetuka menteri muda nya ari bejalaika tanggungpengawa iya tekala nya.
See pechaya atur ke baka nya patut diambi ngambika tau mandang pengeran kepala menteri ti deka nempa atur merintah ti lurus, tebuka enggau enda bechiping.
“Aku minta menteri muda nya ngamatka sumpah integriti iya lalu nyurutka diri ari mangku penuduk dalam perintah maya tasat nya dipejalaika,” ku iya nengah sepuchuk surat penerang berita kemari.
See ke mega ADUN Batu Lintang meri penerang ngenang pemutus SPRM ti udah ngematuka akaun bank penyampau RM4 juta ke diempu seiku menteri muda seraya nganti tasat tembu dipejalaika.
Direktor (Unit Tasat) SPRM Datuk Mohamad Jamidan Abdullah madah, pengawa nya diatur pengudah nerima ripot sentang salah guna kuasa ba projek ngaga opis perintah.
“SPRM nerima ripot sentang ulah ke dipelaba makai suap enggau salah guna kuasa bekaul enggau projek ngaga Baitul Makmur II (16 ringkat) ke beungkus RM250 juta.
“Dikena nasat tuduh nya , kitai ngerikod penerang ari seiku menteri muda Sarawak.”
SPRM mega ngerikod penerang ari seiku orang dagang ke beumur 50 taun ke nyadi direktor kompeni ke alai iya bisi kaul enggau projek ngaga begunan nya.
Mohamad Jamidan madah kelimpah ari nya, sekeda orang bukai mega deka dikangau meri penerang ngagai SPRM sentang kaul ke sama.