Tiga sukut pemansang deka dikemerat ditu iya nya penatai pemisi, ngintu pengerai enggau pekara pelajar
MIRI: Perintah Besai deka terus nyukung ngemansangka ‘Nod Pertumbuhan Baram’ ke udah dipilih nyadi Palan Betanam Betupi Menua Bukit (IHAS), ku Sapit Menteri Besai Tan Sri Muhyiddin Yassin.
Iya madah, dikena ngelai sukung nya, iya milih kampung Long Peluan ke tebal agi diuan raban bansa Kelabit enggau Long Beruan le tebal diuan bansa Penan, nengah IHAS, nyadi kampung iru.
“Sida ke diau ditu deka deka diperatika aku belama, lalu aku ngarapka diri ulih nerima ripot pemansang ari kededua buah kampung tu genap suku taun,” ku iya madah ngagai pemberita ditu, kemari.
Dulu ari nya, Muhyiddin ngulu licha pasal pemansang IHAS ke nyengkaum lapan buah genturung pendiau ari Sapit Kepala Menteri Sarawak Datuk Patinggi Tan Sri Alfred Jabu Numpang.
Muhyiddin madah, tiga sukut pemansang ke deka dikemeratka iya ba dua bengkah kampung tu iya nya penatai pemisi, ngintu pengerai enggau pemansang pekara pelajar.
Perintah Nengeri Sarawak nengah sebengkah penerang ke bisi dipansutka madahka ari sukut pemesai, IHAS di Baram dipelabaka besai agi ari Kundasang di Sabah enggau Cameron Highlands di Pahang, lalu peninggi bukit ba menua nya 3,000 kaki ari paras tasik.
Opis Betanam Betupi Sarawak deka berengkah bejalaika IHAS ke mungkur tanah 634 hektar, lalu berebak enggau nya pengawa ba tanah 20 hektar pemesai diatu udah bepun.
Kelimpah ari nya, projek getah bbekualiti ba tanah 1,178 hektar mega udah dipejalaika ba enam bengkah kampung.
“Ba Langgur Pemansang Malaysia Lumpar Ke-11 (RMK-11), Opis Pemansang Koridor Kandang Menua (RECODA) iaitu iya nya ejensi ke udah diberi pangku pengawa ngemata sereta ngaduka SCORE, deka ngemansangka IHAS begulai enggau Opis Betanam Betupi,” ku berita dalam penerang nya.
Agih belanja kira RM6 juta mega udah diungkup dikena ngaduka jalai puntang enggau jalai kebun.
Baram endang sebengkah ari lima nod pemansang dalam tusun atur Koridor Kuasa Ulih Dikena Baru Sarawak (SCOERE).
Empat nod pemansang ke bukai iya nya Samalaju, Mukah, Tanjung Manis enggau Tunoh ke dipejalaika kenyau ari taun 2009. — Bernama