KOTA SAMARAHAN: Dua buah Opis Besai Imigresyen ke baru deka ditumbuh di Sarawak nambahka 12 buah opis nya ti udah bisi diatu.
Ketuai Direktor Opis Imigresyen Malaysia (JIM) Dato Mustafa Ibrahim madah, kededua opis baru nya deka ditumbuh di Serian ke baru diangkat nyadi pelilih Menua bedau lama tu tadi lalu sebuah agi di Betong.
‘Sekeda kandang endur di Sarawak nadai opis Imigresyen ke alai rayat enggai nyadi enda nempuh pejalai 200-300 KM ketegal deka ngulihka servis ari opis tu ba mengeri bukai.
“Berundingka pinta rayat ti begunaka servis, kitai mutus deka numbuhka dua buah opis besai imigresyen iya nya di Betong enggau Serian,”ku Mustafa.
Iya mansutka jaku lebuh dikerandau pengarang berita pengudah ngemujur pengawa nyuaka ‘Anugerah Perkhidmatan Cemerlang’ (APC) Opis Imigresyen Zon Sarawak di Auditorium Institut Pematih Industri ditu, kemari.
Iya nambah pemutus nya ngipakka pengeran JIM ti deka meri servis ke pemadu manah ngagai rayat seraris enggau ‘motto’ ejensi ‘Cepat, Mudah dan Berintegriti’.
Ku iya, dua buah opis baru nya ila deka meri servis ke sama enggau opis bukai baka ke servis ngaga enggau ngelanjar timpuh sah passport, ngaga visa, minta permit kereja ungkup orang ari menua luar enggau pekara bukai ke bekaul.
Dulu agi ari nya lebuh ke bejaku ngagai raban JIM, Mustafa ngansak sida ke nerima APC mandangka kebuah sida diberi APC.
“APC tu ukai semina dipandang nengah setipikit ke diterima tang ke pemadu beguna iya nya sida patut ngayanka kualiti kereja ke manah.
“Anang ila orang nanya kebuah kita diberi APC enti servis ke diberi enda nyapai ikas ke disadang,’ku iya.
Penyampau 101 iku raban orang gawa Opis Imigresyen Malaysia Zon Sarawak nerima APC ungkup taun 2014.
Bela datai Direktor JIM (Sarawak) Datu Robert Lian.