KUCHING: Mensia mayuh ti diau di Betong nanya Opis Kandang Menua (PBT) nama kebuah sebagi ari belakang Pasar Betong enda dikeibuh nyentuk ke jalai balat endar belubang, taja pan ku jaku dalam timpuh berapa bulan tu ke udah, jalai besai di pasar nya deka dibelakin.
Chairman PKR pampang Betong Vernon Aji Kedit lebuh mantaika pekara tu ba aum media apin lama ti udah, madahka lubang jalai ba belakang selumpung pasar Betong ti bisi sebuah bank komersil (Hong leong Bank).
“Jalai tu suah ditengah luri enggau van ti nganjung barang ngagai palan dagang ngagai pasar Betong,” ku iya.
Vernon, ti mega nyadi Ketuai Pemadah PKR Sarawak madah, seiti agi pekara ti ngenangika kitai iya nya, di belakang rumah kedai repa, lalu rumah kedai ke besepiak nya mayuh ular ke bebisa tama kia ari ringkat atas rumah sereta ngerayap ari perabung rumah ari pun kayu dia.
“Dan kayu sereta babas dia patut ditebas sereta diberesi ngambika nadai endur nyamuk, tikus sereta utai bukai besarang,” ku iya.
Ku iya baru,tebal agi sida ti bekedai dia madah ngagai iya sida kala ngenataika penanggul nya jalai belubang sereta babas ke repa di belakang kedai nya, ngagai Opis Kandang Menua (PBT), tang PBT Betong dipeda baka ke enda kiruhka pekara nya.
“Aku ngarapka berita tu ulih ngerak runding sida sereta ngereja pengawa ke patut dikereja sida.
“Barisan Nasional (BN) seruran madahka sida bisi ngungkupka bebiliun belanja dikena ngemansangka menua pesisir, ti pelaba aku bejuta nya diungkup ke Betong. Enti deka melakin jalai di belakang kedai nya, pelaba aku nadai datai bejuta.
“Nama dalih BN sekali tu meri ungkup kena ngemanahka agi jalai belakang kedai di Betong? Nadai bajet? Tauka bisi lubang ba bajet nya?,” tanya Vernon.