Dikarang Jacqueline R. David//
SADONG JAYA: Pemutus Kot Besai ke minta Komiti Pengawa Bepilih (SPR) ngaduka baru perambu kar sitak kunsil nengeri (DUN) nitihka undang-undang ba Jadual Ketiga Belas endang patut dititih, ku Menteri ba Opis Menteri Besai Nancy Shukri.
“Reti nya taja kot nulak perambu asal tang sida agi ngemendarka pekara tu dipejalai nengah jalai ke patut,” ku iya.
Iya madah munyi nya rambau pengerami Pentas Gawai Waifm Iban 2015 di Rumah Panjai Sg Buluh di sitak Sadong Jaya, ditu, minggu nyin tadi.
Nancy ti mega nyadi Kaban Parlimen (MP) Batang Sadong madahka kot enda ngenggaika pekara nya tang ngasuhka ngaduka baru,” ku iya.
“Enti kitai nitihka atur nya, sigi ngambi timpuh ke panjai. Kitai pan ukai ngenggaika pemutus kot, laban sida iya pan udah mansik lalu beratika atur undang-undang nitihka ungkup undang-undang ke bisi diatu. Nya alai, aku ngasaika pemutus ti digaga kot sigi betul,” ku iya.
Kelimpah ari nya, timbal ari Kaban Kunsil Nengeri (ADUN) Sadong Jaya Ir Aidel Lariwoo madahka pemutus Kot Besai nya mandangka undang-undang kitai nadai utai dipelalaika.
“Enti sebedau tu sida penyakal selalu madahka perintah mayuh utai dikelalai, tang enti ningka pemutus Kot Besai minggu nyin tadi, pengawa magi sitak DUN digaga ulih SPR mandangka undang-undang kitai enda belalai lalu enda ngarika sepiak aja.
“Awakka SPR mutarka pekara ke patut kelebih agi pasal penerang ke patut dibantai ngagai mensia mayuh.
“Kami BN, pekara nadai nanggul, baik nya sitak baru tauka lama, kami tetap ngangkatka BN enggau pemansang di Sadong Jaya,” ku iya.