Dikarang Jacqueline R. David//
SADONG JAYA: Penembu Jematan Sadong Jaya ba taun 2016 ila dikearapka ulih nyungkak penatai pemisi peranak ditu nyengkaum Genturung Pendiau Iban (GPI) .
Juhan anak Jamli, 44, pengajar di Bau asal ari Rumah Panjai Sungai Buluh nya ngarapka mensia mayuh ke diau di sitak nya anang enda ngambi peluang bela ngemansangka diri nengah projek pemansang ke benung dikemujur.
“Ngelama tu nadai mayuh pemansang diasai kami, tang enti jematan tu udah tembu, kami enggai tinggal sama nguna peluang nya ngemajuka diri,” ku Juhan.
Ba penemu iya, peranak rumah panjai ke besemak anang enggai ngemansangka pengawa kraf jari kelimpah ari pengawa betanam betupi tauka sama enggau orang ngemansangka kebun sawit.
Ba penemu Tuai Rumah Sii anak Temenggong Bunsi madahka Jematan Batang Sadong ke nyauka tembu enda lama agi sereta nyadi jematan ke pengabis panjai di Sarawak kala digaga, nyadi sebagi ari jalai niti tebing sungai, Sili ngarapka mayuh aktiviti ekonomi deka dikemansangka ari pemansang nya, kelimpah ari ngemanahka genturung pendiau sida iya ngambika ulih dilawa bala temuai.
“Kami deka ngatur pengawa lumba enggau main ai, ambika chunto baka lumba perau.
“Kelimpah ari nya, nyangka genturung pendiau kami mega ulih dilawa ulih temuai lalu tau alai temuai bebelika barang kraf jari,” ku iya seraya minta bantu ari Perintah ngemansangka pengawa kraf jari sida ari menua nya.
Kelimpah ari nya, iya madah mayuh pemansang bukai ke dipinta sida iya baka ngemanahka agi rumah panjai 22 pintu nya.
GPI tu enda bangat jauh mengeri besai Kuching. Udah manggai lebih 70 taun alai diau lalu bisi 30 pintu serak baru ngentapka diri ngetak rumah ba genturung pendiau tu.