BINTULU: Semua pengajar patut bebendar bejalaika pengawa kena ngemanahka pemutus enggau prestasi pelajar nembiak di menua tu dalam juluk nempa mayuh agi sekula nyulut di Sarawak.
Kaban Parlimen Bintulu, Datuk Seri Tiong King Sing madahka, pemujur pemutus nembiak mega beguna bendar maya nempa nembiak ke nyulut seriris enggau juluk nyapai menua maju taun 2020.
Kenu ku iya, pengawa ngerembaika akses ngagai pekara pejalar bekualiti deka meri peluang ngagai mayuh agi rayat ngemanahka gaya pengidup sida.
“Pemujur ba pelajar tinggi nyengkaum semua dalam sistem pelajar menu tu deka nentuka nembiak di semua sekula nerima penemu enggau pengelandik ti bekualiti,” ku iya.
Iya mansutka jaku nya lebuh pengawa bejadika nyuaka ‘Anugerah Penyulut, Pengawa Bejadi Antologi Pengajar, Inovasi Pengajar enggau Makai Lemai Hari Pengajar Renggat Menua Sarawak di sebengkah hotel tebilang ditu lemai kemari.
Ku iya, pugu pemujur sesebuah sekula nya baka ni chara pengajar nempa ulah nembiak iya ke biasa ngagai ngelui agi ari ke biasa pemutus sida.
“Dikena nyapai juluk nyadi menua maju taun 2020, transformasi dalam bidang pelajar patut seruran dipejalaika dikena ngadaka modal mensia ke menyana,” ku iya.
Kenu ku iya, pemujur pemutus sesebuah sekula nya ukai semina dipeda ari sukut pemutus akademik aja tang ngadaka nembiak ti ngembuan pengelandik intelek, sosial, fizikal enggau ulih nelebaka diri dalam mayuh pengawa.
Iya mega ngelalau raban pengajar bejalaika anjakan perubahan enggau ngemanahka dikena nyungkak penyulut ba pemutus pejalar nyengkaum ulah nembiak di sekula sida.
Udah nya, Mandal Direktor Opis Pelajar Nengeri Sarawak, Abang Mat Ali Abang Masagus madahka, sukung sereta pengawa nyaup raban pengajar enda ulih diberi rega dalam mayuh bengkah program di sekula meri pangka dalam ngadaka nembiak rebak baru ke ngembuan semengat besemekih dalam dunya kemaya hari tu.
Ku iya, piak opis menteri nya seruran nyadi tiang raban pengajar ngambika terus ngemeranka pengawa nempa nembiak rebak baru di Malaysia nengah sistem pelajar menua ke tegap bepelasarka nilai enggau budaya menua tu.
“Pengajar nyulut nyadika agen ubah enggau ngenambahka mayuh agi penyampau orang ke mujur dalam pengidup,” ku iya.
Ba pengerami nya, Tiong bisi madah deka meri bantu RM20,000 dikena nyaup pekara belanja pengarami Hari Guru Renggat Menua Sarawak di Bintulu.
Bela bisi datai ngulu pengerami nya, Direktor Institut Aminuddin Baki, Serina Sauni; Residen Bagi Menua Bintulu, Muhamad Yakup Kari; Sekretari Politik Kepala Menteri, Jenny Bangga; Sekretari Sulit Menteri Muda Dagang Temuai Datuk Talib Zulpilip, Othman Mat; Pemesai Opis Pelajar Pelilih Menua (PPD) Bintulu, Abdul Mu’in Abdul Kassim, Pemesai PPD Sebauh, Tero Bayel enggau Pemesai PPD Tatau, Mohadi Mubin.