Dikarang Rengenyan Labang//
KUCHING:Penyakah enggau pemujur perintah bejalaika Langgur Pemansang Malaysia Lumpar Kesebelas (RMK-11),ulih nambahka pemansang menua Malaysia.
Menteri Muda Dagang Temuai Datuk Talib Zulpilip madah, langkar ti dipasukka dalam RMK-11 mungkur pekara ti ulih ngangkatka penumbuh ekonomi menua sereta ngemeratka rayat.
Tambah mega orang ti meri penemu sebedau ngelangkar sereta merambu RMK-11 nadai bekaul enggau politik, ku iya.
“Aku ngasaika RMK-11 tu udah diperambu enggau manah laban sebedau nyadi seiti langgur, mayuh piak ti enggau ngelangkar baka pengereja pengawa opis perintah, Gerempung Ukai Dikuasa Perintah (NGO) enggau raban orang dagang,nadai kaul enggau orang politik.
“Buah runding, penemu enggau timbal ari semua piak nya diperunding lalu aku meda mayuh langkar ti dipasukka nya meri pangka ti manah ngagai menua.
“Dalam RMK-11 tu mayuh pekara ti ngemeratka rayat baka ngangkatka pengelandik teknikal rayat, laban enti deka nyadi menua maju pengelandik teknikal patut diangkatka.
“Nyema semua langkar (RMK-11) dipejalaika enggau manah, aku arap bendar Malaysia deka betambah maju lalu kitai ti nyadi rayat deka berasai temegah endar ati,” ku iya seraya ngarapka RMK-11 ulih dipejalaika enggau chakah agi.
Talib mansutka penemu iya lebuh dipinta meri penerang bekaul enggau RMK-11 ti dipejuraika Menteri Besai Datuk Seri Najib Tun Razak ba Dewan Rakyat ensanus (Hari Empat) pukul 11.30 pagi.
Dulu ari nya, dalam aum pengarang berita Talib madahka pasal ‘Leema Waterfront Busking Festival 2015’ deka diatur dalam bulan Jun tu.
“Aku arap bendar penumbuh GDP ti tinggi ulih dijapai sereta proses ngagih tauka ngungkupka asil penumbuh nya bisi disengkaum dalam langgur (RMK-11), nya chara ti manah,” ku iya.
Dalam RMK-11, enam teras strategi dikemeratka iya nya ngenegapka inklusiviti ngagai raban bansa ti enda bechiping ati, ngangkatka pengelantang rayat, ngangkatka pemansang model mensia nuju menua maju, ngemeratka penumbuh gadung dikena ngangkatka penegap enggau daya besemekih, ngenegapka infrastruktur dikena nyukung penumbuh ekonomi sereta nyungkak penumbuh ekonomi dikena ngangkatka pemaik enggau pengelantang.
Dalam RMK-11, perintah deka chakah meri mayuh agi pemansang timpuh panjai ngagai rayat sekalika di mengeri tauka menua pesisir Sabah enggau Sarawak.
Najib madah, mayuh bengkah pekara dikemerat dikena ngemansangka nengeri Sabah enggau Sarawak ti mungkur perengkaguna mensia mayuh, nambah enggau ngemanahka infrastruktur jalai alun enggau padang bilun, pemansang menua pesisir, nambahka peluang gawa, pengerai, sepital enggau ke bukai.