KUCHING: Perengkaguna orang bejual ba Tamu Betong patut dikemanahka agi ngambi pulaika pengelantang orang ti bejual ba Tamu nya, kelebih agi nyerumba pengerami Gawai ti deka diintu enda lama agi.
Lebuh ti ninjau ngagai Tamu Betong apin lama ti udah, Ketuai DAP Betong, Gerald Roger Anding beratika mayuh pengurang ba palan bejual nya.
Ku Gerald, palan bejual ti tebilang di Betong nya suah dedat laban orang ti bejual beli ba endur nya.
Ketegal awak ti enda chukup, sekeda sida ti bejual ba Tamu Betong nya nyau bejual ba tisi jalai enda ngira hari panas tauka ujan ketegal deka ngulihka belanja.
“Ba pasar besai baka di Kuching, Sibu, Bintulu enggau Miri orang ti bejual asil kampung diberi ejensi perintah baka Opis Dagang Betanam Betupi Perintah Besai (FAMA) payung/langkau enggau mija ngambi pulaika pengelantang sida ti bejual.
“Tang ba Tamu Betong orang ti bejual nya nadai disedia perengka nya ti ngujungka sida bejual ba panas,ujan di kaki lima.
“Laban pengerami Gawai deka diintu enda lama agi, aku arapka perintah nengah ejensi perintah baka FAMA ulih nyendiaka perengka ti patut ngagai orang ti bejual ba Tamu Betong,” ku iya.
Kelimpah ari nya, Gerald ngansak raban ti bekaul nyendiaka perengkaguna pengangkut ti manah sereta likun ngagai mendia mayuh, kelebih agi ngagai sida ti deka mulaika diri ke menua maya Gawai tu.
Ku Gerald, diatu semina bisi dua buah kompeni bas ti nyendiaka servis bas di Terminal Bas Betong ba Bandar Baru Medan.
Penanggul ditu, laban tebal agi peranak menua ti mulaika diri nepan bas ekpres, nurunka diri ba simpang Betong, enggai enda pan sida ngiga chara bukai enti deka ke pasar Betong.
Ku Gerald, ke bendar udah lama penanggul tu nyadi tang nadai siku pan bisi mantaika pekara tu sereta sanggup bepadat dalam bas ti betimpuh nuju menua sida.
Berindik enggau nya, iya ngansak raban ke bekaul kelebih agi kompeni bas ngemanahka servis nya ngambi pulaika pengelantang sereta pengelikun mensia mayuh.