KUCHING: ‘Leema Waterfront Busking Festival’ ti keterubah diatur di Sarawak ulih nyadi pematak baru industri dagang temuai di nengeri tu.
Menteri Muda Dagang Temuai Datuk Talib Zulpilip madahka pemerindang ti bepelasarka pengerai nya ulih dikerembai sereta chakah dipejalaika nyema bisi sukung semua piak sereta bisi orang bepengelandik.
“Pemerindang ti baka tu (Leema Waterfront Busking Festival) endang ulih nyadi pematak ngagai dagang temuai laban nadai sekat asal bisi pengelandik.
“Busking tu endang suah dipeda tang ke sekali tu diatur nyadi sebuah festival, ke tau dikumbai kitai pesta rayat tauka pemerindang rayat.
“Aku arap bendar festival tu ulih ngerembai lalu nyema bisi orang ari menua tasik deka ngambi bagi dalam festival, nya nadai salah laban tu pemerindang bepelasarka pengerai.
“Nyema Leema Waterfront Busking Festival 2015 nerima sambut ti manah sereta mujur kitai deka ngatur tu ninting taun. Kitai nguji (ngemasukka dalam kalender dagang temuai), bisi sektor peribit deka nyukung kitai ngatur nya ,” ku iya.
Iya ti mega Chairman SEDC Sarawak mansutka penerang tu lebuh dikerandau dalam aum pengarang berita Leema Waterfront Busking Festival 2015 ti diatur ba opis iya di Menara SEDC ditu, kemari.
“Nambahka nya tuju festival tu meri peluang ngagai raban ‘street performers’ mantaika pengelandik,” ku iya.
Festival tu diatur Kuching Waterfront lalu dipelanja Leema sereta Radio Cats, ke diatur kena 5-6 Jun (renggat keterubah) ba sepemanjai Tebing Ai Kuching, lalu kena 13 Jun, renggat Final diatur ba Godown Amphitheatre.
Raban Buskers, orang seseiku tauka tim enda ngira sekalika penyanyi, pemuzik, raban orang betanda, raban magik enggau ke bukai diperansang masuk festival tu, lalu semina dipinta mayar RM20 aja.
Sepuluh iku orang ti ngatika diri tauka tim ti pemadu manah deka dipilih ngagai renggat final. Perais lumur satu RM800, lumur dua (RM500) enggau lumur tiga (RM300) sereta trupi. Semua ke masuk renggat final diberi hamper.
Pom peminta enggau masuk festival tu tau diambi ba Kuching Town Souvenir, Level 1, Riverside Shooping Complex enggau Mahua Enterprise, Level 1, Sarawak Plaza Shopping Complex.
Penerang silik pasal festival tu ditanya ngagai opis Kuching Waterfront nengah lumur 082-426093 tauka 0198180888.