Dikena ngemujurka pekara nya, ngarapka rayat anang pambar nyukung perintah, ku Mawan
PAKAN: Perintah patut ngemeratka pekara ke dipinta rayat taja sekeda ari pengawa nya begunaka timpuh ke lama endur tembu.
Menteri Pemansang Rama, Tan Sri William Mawan Ikom madah, bala ketuai enggau perintah nemu sentang penanggul ke ditapi rayat, kelebig agi di menua pesisir enggau ulu sungai agi tubah begunaka pemansang baka perengka infrastruktur.
“Taja pia, rayat patut nemu genturung pendiau ke dientak ngachir di menua pesisir enggau di menua ulu ngujungka perintah pedis mimit deka ngaduka pemansang sereta begunaka timpuh alai bejalaika pengawa nya.
“Rayat patut mereti pasal pekara tu. Perintah deka bebendar nguji meri pemansang ngagai rayat di menua pesisir engagu di ulu sungai enggau chara berenggat-renggat.
“Kami (perintah) nemu isu ke suah dikemanaka rayat di menua pesisir diatu iya nya pasal perengka jalai raya ke menyana, bekal elektrik enggau ai beresi,” ku iya rambau program Ketuai Begulai Enggau Rayat di Rumah Melaka Gimang, Nanga Bekakap, Ulu Entabai Julau, kemari.
Kenu ku Mawan, semua pemansang ke dipinta rayat nya tetap deka digaga perintah tang dikemujurka enggau chara berenggat-renggat.
Iya madah, program pemansang tu digaga nitihka atur ke udah dilanggur ngambika rayat terus ngasaika pengidup ke lebih meruan.
Kaban Kunsil Nengeri (ADUN) Pakan nya mega ngelalau mensia mayuh anang jampat mut-mut nema peminta sida enda ulih digaga baka kala disemaya.
“Kami deka ngelalau kita (rayat), genap pemansang ke digaga nya meseti nitihka atur ke udah ditetap sebedau iya dikemujur.
“Aku deka madah nyemetak ditu nadai perintah bukai ulih ngereja pengawa baka nya kelimpah ari Barisan Nasional (BN). Kebuah pia, laban kami seruran berundingka chara pemadu manah dikena ngintu pengelantang rayat.
“Tambah mega, pemansang ke digaga ukai semina numpu ngagai seiti sukut aja tang mungkur semua nyengkaum pekara infrastruktur, pelajar, pengawa betanam betupi enggau mayuh agi kebukai.
“Tang dikena ngemujurka pekara nya, rayat anang pambar nyukung perintah,” ku iya.
Pengerami nya diatur Opis Pekara Khas (JASA) Sarikei, lalu ba pengerami tu mega Mawan bisi nyuaka geran RM30,000 ungkup Rumah Melaka Gimang.
Sama bisi datai pengari pemesai Pelilih Menua Pakan, Yalin enggau Sekretari Opis Kaunsil Pelilih Menua Meradong, Julau (MDMJ), Adrian Luang sereta bala ketuai raban bansa di menua nya.