Sarawak begunaka lima buah kilang sawit: Uggah

0

Dikearapka bisi kompeni ulih numbuhka kilang ditu berindik ari pekebun sawit ke majak mayuh

SRI AMAN: Opis Menteri Kebun Dagang Besai enggau Komoditi ngelaluka raban kompeni beranakka puku enggau chara numbuhka kilang kelapa sawit di Sarawak.

Menteri iya, Datuk Amar Douglas Uggah Embas madah, batang tuju nya berindik ari penyampau pekebun mit kelapa sawit ke majak mayuh sereta dikena mantu sida bejualka tandan sawit.

Kenu ku Uggah, Sarawak begunaka ambis nadai lima buah kilang kelapa sawit kediri empu ke ukai digaga kompeni tauka tauke kebun kelapa sawit.

“Nyadi aku andal nengah chara baka tu ulih mantu bala pekebun mit bejualka buah sawit enggau rega ke manah,” ku iya.

Iya madah munyi nya rambau bejadi Program Transformesyen Enggau Ngemansangka Pekebun Mit Sawit Sarawak di sebengkah hotel ditu, kemari.

Kaban Parlimen Betong tu madah, diatu mayuh raban pekebun mit nyual tandan sawit sida ngagai palan ke semak ba menua diri empu.

Tang sida betapi enggau penanggul laban palan nya meli enggau rega ke mit enti dibanding enggau rega ke dijual ba kilang,” ku iya.

Nya alai, ku iya chara bukai dikena mutarka penanggul tu iya nya tumbuhka gerempung kerejasama ari raban pekebun mit.

“Penanggul diatu nyema bisi orang nyual sawit ngagai kilang sida diberi resit ke semina ulih nerima rega iya dalam kandang sebulan tang enti nyual sawit ngagai palan pemeli sida nerima rega enggau rega ke mit.

Enti bisi gerempung kerejasama tentu penanggul tu ulih diputar enggau chara meri duit tekala nya, udah nya sawit ulih dijual ngagai kilang enggau rega ke patut,”

Dipelabaka urung 300 pekebun mit ari menua Sri Aman nyengkaum ari pelilih Lubok Antu  nyereta program nya.

Bela bisi datai Menteri Muda  Betanam Betupi Chara Moden, Datuk Mong Dagang, Kaban Parlimen Sri Aman, Masir Kujat, Sekretari Industri Sawit (MPIC) Ak Nan Entook enggau Direktor Integrasi MPOB Haji Wahd Omar.