Ruang bilik ti kena bungkur projek tekad ai Bengoh tu ari genturung pendiau Rejoi, Taba Sait enggau Pain Bojong
Dikarang Rengenyan Labang //
KUCHING: Pengawa mindahka semua 49 buah ruang bilik ari tiga buah genturung pendiau ti kena bungkur projek pemansang tekad ai Bengoh ti bedau pindah ngagai Skim Palan Pengentap Berumah Baru Bengoh, dipelabaka ulih dipindahka magang sebedau ujung taun 2015.
Nitihku Residen Kuching Shukarmin Chasemon, diatu benung dalam proses nyendiaka perengkaguna mensia mayuh baka bekal lekterik, ai enggau ke bukai ba 49 buah rumah nya.
Sida 49 buah ruang bilik ti bedau pindah nya nyengkaum ari Genturung Pendiau Rejoi, Taba Sait enggau Genturung Pendiau Pain Bojong.
“Diatu kami dalam proses ngatur pengawa mindahka 49 buah ruang bilik (ti kena bungkur projek tekad ai Bengoh) ti baru udah setuju dipindah ngagai Skim Palan Pengentap Berumah Baru Bengoh. Dua minggu ke udah kami bisi baum sereta surat minta sida pindah deka diberi.
“Dipelaba semua sida 49 buah ruang bilik tu ulih dipindah magang sebedau ujung taun tu. Enti semua udah dipindah dia pengawa nekad ai ba tekad ai Bengoh ulih berengkah dipejalaika.
“Udah nya ila kitai nadai agi betapi enggau penanggul suntuk ai, di Kuching enti nadai ujan dua minggu endang enda chukup ai laban pemayuh mensia di Kuching nyau manggai 800 ribu iku,” ku iya lebuh dikerandau pengarang berita.
Dulu ari nya Shukarmin ngulu pengerami bejadika Padawan International 4×4 Off Roaders Extreme Challenge 2015, ti dipenyadika Menteri Muda Pengerai Mensia Mayuh Datuk Dr. Jerip Susil, ke diatur Majlis Perbandaran Padawan (MPP) ba Skim Palan Pengentap Berumah Baru Bengoh di Padawan ditu, kemari.
Diatu semina 155 buah ruang bilik ari empat buah genturung pendiau ti kena bungkur projek tekad ai Bengoh udah diau ba skim nya, ku iya.
Skim Palan Pengentap Berumah Baru Bengoh ungkup 204 buah ruang bilik ari empat buah genturung pendiau ti kena bungkur projek pemansang tekad ai Bengoh iya nya, Genturung Pendiau Semban, Rejoi, Taba Sait enggau Genturung Pendiau Pain Bojong.
Nitihku Dr. Jerip dalam aum pengarang berita kemari diatu pengawa meresi kandang endur tekad ai benung dipejalaika, kelimpah ari ngatur pengawa mindahka 49 buah ruang bilik nya.
“Pengawa nekad ai tu bepanggai ngagai piak kontrektor Naim lalu aku arap bendar diatu sida benung chakah bejalaika pengawa meresi kandang endur nya, lalu tembu nya dia pengawa nekad ai ulih dikereja,” ku iya.
Ba aum pengarang berita ti bekaul enggau 49 buah ruang bilik nya ti diatur dalam bulan April tu tadi, Dr. Jerip madah, 49 buah ruang bilik nya patut ngempu rumah ba Skim Palan Pengentap Berumah Baru Bengoh, laban nya endang hak sida.
Nitihka perintah kot sida (49 buah ruang bilik) bisi hak nerima elawin pindah ti urung RM8,000 nyentuk RM10,000, ngempu rumah ba Skim Palan Pengentap Berumah Baru Bengoh, nerima lot betanam betupi ti mesai tiga ekar sereta bisi hak diau ba genturung pendiau asal sida, ku iya.
“Bekaul enggau bayar rumah nya, semua ti berejista dalam e-kasih nadai dipinta mayar rumah tu, lalu sida ti gawa ba opis perintah semina dipinta mayar beberapa peratus ari penyampau rega rumah nya,” ku iya.
Ejensi ti bekaul enggau pengawa mindahka raban nya nyengkaum opis Residen, Opis Tanah enggau Survei, Sarawak Energy Berhad ti nyendiaka bekal lekterik sereta Opis Kereja Raya ti nyendiaka bekal ai enggau ke bukai.