KUCHING: Timpuh kontrek raban Opis Pemansang Komuniti (KEMAS) ti gawa nengah chara kontrek deka dilanjar dua taun lalu ukai agi setaun baka ke udah, ku Sapit Ketuai Direktor (Tusun Pengawa enggau Pemansang) Hassan Manaf.
Bejaku meri penerang ba pengerami nyuaka ‘Anugerah Perkhidmatan Cemerlang’ (APC) 2014 KEMAS Zon Sarawak kemari, iya madahka pekara nya udah dikerandau lalu dipesetuju.
“Ba aum begulai enggau Direktor Pemansang Organisasyen kena 14 Mei tu tadi, kitai setuju kontrek dilanjar ungkup timpuh dua taun lalu ukai setaun aja baka ke udah,” ku iya.
Taja pia iya ngelalau raban KEMAS ke gawa kontrek bela ngingat sereta ngenataika pinta kontrek dilanjar ngagai KEMAS dalam timpuh lapan tauka semilan bulan sebedau timpuh nya tembu.
Ku iya, sigi tanggungpengawa tiap iku sida ngenataika pinta lalu anang kelalu ngarapka KEMAS mantu sida sentang pekara nya.
“Pekara tu berat ketegal kitai deka nganjung pinta timpuh dilanjar ngagai Jabatan Perkhidmatan Awam (JPA) dulu enam bulan sebedau timpuh kontrek sida tembu.
“Naka ke diatu, kitai bisi urung 4,000 iti kes ke baka tu bedau diputar lalu JPA mega udah nganjung 3,000 iti Surat Madahka Kebuah sentang pekara tu,” ku iya nambah.
KEMAS ngembuan lebih 17,000 iku pengereja gawa ti gawa sechara kontrek di serata menua lalu bisi lebih 900 iku orang gawa tetap.
Sarawak mega nyadi nengeri ke pemadu mayuh pengereja pengawa ba KEMAS iya nya lebih 2,200 iku (tetap enggau kontrek) lalu ditangkan nengeri Sabah.
Ngenang kaul bukai, Hassan madahka perambu meri Bantu Penyanding Pengidup RM300 ninting bulan ngagai sida ke udah pinchin, benung nganti pemendar ari Ketuai Sekretari Menua (KSN).
“Bantu tu semina diberi ngagai raban KEMAS ti udah gawa ngelui ari 15 taun sereta ngetu ari pengawa meri servis perintah ba umur sida patut pinchin,” ku iya.
Hassan mega madahka KEMAS diatu benung ransing berunding enggau perintah (JPA) ngambika 17,000 iku orang gawa ti nengah chara kontrek nya ulih diubah nyadi pengereja pengawa tetap.
Ku iya, pekara tu benung diperunding lalu ukai pekara ke mudah diadu ketegal begunaka belanja manggai bejuta ringgit.
“Taja pan enda mudah, kitai enda mantul ari minta sida ke gawa nengah chara kontrek diubah nyadi pengerja pengawa tetap. Pinta tu deka dipajakka belama,” ku iya.
Ba pengerami ke diatur di Auditorium Begunan Sultan Iskandar kemari, penyampau 184 iku raban KEMAS ari serata pelilih menua nerima APC lalu pengawa nya dikemujurka Hassan.
Bela bisi datai, Direktor KEMAS Sarawak Abang Rabaee Abang Muhi.